Pasaporte indargabetua: Ga(t)za 2

Atalak: Gaza, Mahmud Darwish, Setio egoera

Bizilagunak akabatu nahian, borreroek betiko logika jartzen dute abian, zure nortasuna desjabetuz, zure izena ezabatuz, zure pasaportea indargabetuz, zure gorputza konfinatuz, zure bizitza giltzapetuz. Halaxe gertatu zen, Israelgo estatuak idazlearen pasaportea indargabetu zuenean, baina palestinar hau ez zen batere kikildu.

Pasaportea indargabetu ziotenean, bere erantzuna hitzak indartzea izan zen. Paper ofizialak baliogabetuak direnean, edozer olerki balio handikoa da. Ez alferrik, bere nazioa bere hizkuntza dela errana utzi zuen idazle honek. Hizkuntza da azken babeslekua, apika leku bakarra, palestinarrek ongi dakiten bezala. Hilketa bakoitzean, triskantza orotan, hitzak dira behar dugun pasaporte bakarra, pasabide paregabea, estaturik gabeko geografian, erresistentziaren kartografia prekarioan, non Job eta Ayyub biltzen diren aho batez.

PASAPORTEA

Ez naute ezagutu pasaportean ene kolorea

lausotzen duten itzalen artean.

Nire urratua agerian zen

postal amorante

turistaren aurrean.

Ez naute ezagutu … Ai, ez ukatu

eguzkia nire esku ahurrari,

zuhaitzak ezagutzen bainau..

Euriaren kantu guztiak ezagutzen naute,

ez iezadazu utzi ilargia lez zurbiltzen.

Ene esku ahurrak urrutiko aireportuaren sarreran

jarraitu dituen txori guztiak,

gari-soro guztiak,

kartzela guztiak,

harrizko hilobi guztiak,

muga guztiak,

astindutako zapi guztiak,

begi guztiak

nirekin nituen, baina haiek

nire pasaportetik ezabatu zituzten.

Desjabetua izenez, ondasunez,

esku hauekin hazi den lur batean?

Job-ek bere garrasiz bete du gaur ortzia:

Ez nazazue hartu ostera eredutzat!

Jaun-andreok, profetok,

ez galdetu zuhaitzei beren izenaz,

ez galdetu haranei beren amez:

ene bekokitik argiaren ezpata banantzen da,

eta ene eskuak errekako ura du jario.

Gizakiaren bihotz guztiak … ene naziotasuna dira:

Erretira iezadazue pasaportea!

* Oharra: 1970an karrikaratutako olerki honek ez du indarrik galdu. “Pasaportea” izenekoa, 2014an Itu aldizkarian euskaratua izan da, duela gutxi.