Miguel Sánchez-Ostiz adiskidekeriaren txarrantxa kulturalaren aurka

Atalak: Ekonomia, Kultura, Miguel Sánchez-Ostiz

Erregimen usteldua hainbat urtetan mantendu denean, eraldaketa ez dator gauzarik aldatzeke –aldaketa ez da trukaketa, haurren kromoekin bezala–. Ekonomian adituek crony capitalism (adiskideen kapitalismoa) deritzote adiskidekeriaren sistema usteldu horri. Hori dela kausa, interesen eta bezeroen sare hedatua desegin behar da, ekonomian eta kulturan aldaketa sakona nahi izanez gero. Helburu nagusia ez da aurrekontuetan diru gehiago sartzea (diru gehiago beharrezkoa da gauza publikoetan, baina xede hau irtenbide sozioliberal azkar eta arina da, epe ertainera arazoak konpontzen ez dituena), baizik eta lurralde baten antolakuntza, egiturak, jarlekuak, moldeak eta pentsamoldeak iraultzea, jatorrismotik eta adiskidekeriatik haratago. Nafarroa Garaian edo Erresuma Zaharrean edo Nafarroako Foru Komunitatean edo txarrantxaz jositako Etxalde Foralean ikusteko dago nola deuseztatu adiskidekeriaren sistema hori, kulturan batik bat. Gai honetaz Miguel Sánchez-Ostiz idazle nafarrak sarrera berria izkiriatu du bere blogean, hurrengo lerroetan euskaratu dudana:

“Erresuma Zaharrean (ia oso unatuta) gauza kulturalaren buruak dio kulturaren duintasuna berreskuratu behar dela Nafarroan eta aurrekontu duina eman behar zaiola, eta nik neure buruari galdetzen diot ea Nafarroako Gobernuaren Kultura Sailaren lehen xede saihestezinak –eta feria kulturalez diharduten Estatuaren bertze erakundeen eta gobernuaren xedeak– ez lukeen izan behar zor-faboreen eta adiskidekeriaren sistema mafiosoa, zerrenda beltzak, urdinak eta kolore-sorta, betoak eta kanporaketak likidatzea, hala Kulturan nola Argitalpenetan (Presidentzia?), UPNen jarauntsiak izanik … Hor benetako aldaketak ikusten ditudan egunean, proiektu horretan sinetsiko dut, bitartean ez. Nire eskubide osoan nago. Hemen ez dago konfiantzazko botorik, behintzat niretzat. Bortz axola zait argazkian ez ateratzea, aski da, bai bezala agertuz, ez bezala denean.”