Palestinak eskatu du Israel FIFAtik kanporatzeko

2015-04-13  //  Futbola, Palestina  //  Iruzkinik ez

“FIFAren arauak errespetatzen ez dituen bitartean, palestinar kirola suntsitzeko ahaleginari eusten dion heinean, Israelgo futbol federazioa (IFA) kanporatu egin dezan eskatzen diogu nazioarteko erakundeari”, adierazi du Palestinako federazioko (APF) presidente Yibril Rayubek, Kairon emandako prentsaurrekoan.

Josep Blatter FIFAko presidenteari bidalitako gutunean (gaztelaniazko bertsioa / frantsesezko bertsioa), lurralde okupatuetako kirolarien eskubide urraketak nabarmendu ditu Palestinako federazioak: “Israelgo estatuak kontrolatzen du IFA. Israelen irudi positiboa promozionatzeko baliatzen du, herrialde demokratiko moduan aurkeztuz, non kirolari palestinarrek bermaturik izango luketen berdintasun eskubidea. IFAk ez du gezur hori sekula salatu. Israelek nazioarteko txapelketetan parte hartu eta FIFAko kide izateak, aditzera ematen du bere politikak onartuak direla; eta eraso militarrak inplizituki sarituak dira. Israelek apartheid politika, okupazioa eta garbiketa etnikoa gauzatzen dituela inork ez du zalantzan jartzen. NBEko adituek baieztatu dute. (…) FIFAri eskatzen diogu bere arauak bete ditzan. Arrazismoa eta diskriminazioa debekatzen ditu, joko garbia aldarrikatu, eta ez du onartzen kideetako batek beste bat zapaltzea”.

(gehiago…)

Brasil: Luxuzko hotel olinpikoa izan beharko litzatekeena, etxerik gabekoek okupatua

2015-04-10  //  Brasil, Joko Olinpikoak  //  Iruzkinik ez

Hilaren 7an okupatu zuten eraikina (Argazkia: AP Photo / Silvia Izquierdo)

Abandonatutako eraikin handi bat okupatu dute ehun bat lagunek Rio de Janeiro hiriko Flamengo auzoan. Agintariek etxebizitza bat eman bitartean hantxe jarraituko dutela adierazi dute.

(gehiago…)

Diego Armando Maradona, Kolonbiako bake prozesuaren aldeko partiduan

2015-04-09  //  Futbola, Kolonbia  //  Iruzkinik ez

Diego Armando Maradona argentinarra Bogotan da jada. Piedad Córdoba senatari ohiarekin ageri da argazkian.

Kolonbiako bake prozesuari bultzada ematea helburu, futbol partidua jokatuko dute bihar Bogota hiriburuan, Gatazkaren Biktimen Eguna dela-eta prestatutako egitarau oparoaren baitan.

(gehiago…)

Guraso ipurterreentzat komikia, futbol zelaietan azaltzen duten jarrera zuzentzeko

2015-04-07  //  Futbola, Komikiak  //  Iruzkinik ez

Ondarroako Aurrera Kirol Elkarteak eta Brontxek komikia plazaratu dute, helburu duena guraso askok futbol zelaietan erakusten duten jarrera azaleratu eta haurrek kirolarekin disfrutatu egin behar dutela aldarrikatzea.

Kataluniako areto futboleko selekzioa Munduko Kopatik bota dute

2015-04-01  //  Futbola, Herrialde Katalanak  //  Iruzkinik ez

Espainiako Gobernuaren eskua ikusi du erabakiaren atzean Kataluniako Federazioak. Argazkian, iazko Europako Txapelketan aritu ziren jokalariak.  (L’Sportiu)

Kataluniako areto futboleko gizonezkoen selekzioak ez du Bielorrusian jokatuko den Munduko Kopan lehiatzerik izango, sailkaturik egon beharko litzatekeen arren, Europako Txapelketan lortutako emaitza medio. L’Esportiu egunkariak jakinarazi duenez, Bielorrusiako areto futboleko federazioak Nazioarteko Federazioari (AMF) eskatu dio Katalunia eta Taiwango selekzioak Munduko Kopatik at uzteko, “Espainiako Estatuaren eta Txinaren errepresalien beldur”.

(gehiago…)

Ziklismoa, Europa idealizatuaren saltzaile?

2015-03-30  //  Txirrindularitza  //  Iruzkinik ez

Frantziako Tourra da erakusleihorik handiena, saltzailerik onena. (Argazkia: Naturpixel)

“Txirrindularitza profesionaleko lasterketek Europa idealizatu eta nekez sinestekoa sustatzen dute”, irakurri dugu Diagonal agerkarian. Javier de Frutosek dio txirrindularitza “paisaia hutsa” dela,  gerra bera hamaika bider kontatu duten kronisten ahalegin poetikoaz gaindi sarri ez dela deus gertatzen, eta karrera handietan urtetik urtera gai igualak errepikatzen direla: artasoroak, ekiloreak, olibondoak, mahastiek inguratutako gaztelu zaharrak, jauregiak,  kalezulo harriztatuak, haize errotak… “Guztiak balio du. Guztia dago salgai. Eskualde, herrialde, departamendu edo dena delakoak ikuskizunaren sustatzaile handiak dira. Europa aurkezten zaigu kontsumo planetarioaren dekoratu gisa”, dio kazetariak.

(gehiago…)

Jauzia: Selekzioaren ofizialtasuna xede, herri-proiektua ardatz, eskola kiroletik goi mailaraino

2015-03-18  //  Euskal selekzioak  //  Iruzkinik ez

“Euskal kirol selekzioek eta euskal kirolariek nazioarteko txapelketetan modu ofizialean parte hartzeko aldarriari hauspoa ematea” du helburu Jauzia herri ekimenak, aurkezpen agirian dioenez. “Dimentsio berri bat, agertoki ezberdin batetara Jauzia egiteko garaia. Eta hori da euskal kirol selekzioen ofizialtasunaren alde ekimen honen bidez egin nahi duguna”. Hastapenetan dira oraindik, harreman fasean, argi baitute helburu handiagoetara heltzeko oinarrian egin behar dela lan, ekimeneko kide Unai Guillen eta Beñat Zarrabeitiak azaldu diguten moduan. Bilboko Kafe Antzokian egin dugu hitzordua.

Unai Guillen eta Beñat Zarrabeitia: “Kirolariek agertutako borondateari erantzun egin behar zaio”

(gehiago…)

Azafata baten ipurdia, txirrindularitza probaren amu

2015-02-24  //  Txirrindularitza  //  Iruzkinik ez

[2015-02-26]

H3 Harelbeke lasterketaren antolatzaileek erabaki dute kartel polemikoa publizitate euskarri guztietatik kentzea [Marca], UCI Txirrindularitzaren Nazioarteko Batasunak –prentsa ohar labur baten bitartez– bere disgustua azaleratu eta gero.

[2015-02-24]

H3 Harelbeke lasterketaren kartela.

@Txintiki eta @Tropela erabiltzaileek ohartarazi naute. Ikusi al duzue Flandrian egiten den E3 Harelbeke txirrindularitza lasterketaren kartel ofiziala?

Klik egin eta hara! podiumera igo ohi diren nesketako baten ipurdia, eta ziklistaren eskua hurbilduz… Inspirazio bezala erabili dute iazko Flandriako Tourreko podiumean Peter Sagan txirrindulariak egindakoa, azafata bati ipurdia ukitu zionekoa (2013an ere saiatu zen, Harelbeken; ordukoa da beheko argazkia)

Eta leloa: “Wie ‘knijpt’ ze in Harelbeke?” (Nork ‘estutzen’ du Harelbeken?)

Wie ” knijpt “ze in Harelbeke? Geïnspireerd op Sagan tijdens podiumceremonie @E3Harelbeke 2013! #cycling pic.twitter.com/enTVG5WFFu

— E3 Harelbeke (@E3Harelbeke) February 23, 2015

Antolatzaileek diote kartel ausart edo adoretsua dela (gewaagde). Irudia definitzeko beste hitz batzuk bururatzen zaizkigu guri, Tropelako kideen iritzitik gertuago daudenak…

Guri @E3Harelbeke-ko aurtengo kartela matxista xamarra iruditzen zaigu. Zuei? #tropela pic.twitter.com/YX5AHxOetx — Tropela Elkartea (@tropela) February 24, 2015

Iazko kartelak ere dezenteko zalaparta sortu zuen… … baita 2011koak ere, Zigor Muñoaren Twitter kontuan ikusi dugunez. Luzitzen ari dira.

#E3Harelbeke-ko 2011ko kartela ere, mortala. UCIk serio arautu beharko luke matxismo mota hau (eta beste batzuk). pic.twitter.com/uLsLl0PlCb — Zigor Muñoa (@ziklistillo) February 24, 2015

Podiumeko neska pinpirinak

Sariak eman ohi dituzten emakumeen paperaz zein iritzi dudan azaldu dut lehenago. Berriro diot, dena den: Etapak amaitzen diren zonaldeko ziklista gazteak igoko nituzke podiumera, edo lasterketak musu-truk antolatzen dituzten boluntarioak, itzalean lan egiten duten horiek. Marka komertzialek-eta argazki ponpoxoak bilatu ohi dituzte, ordea…

“Arrazistak gara eta gustuko dugu”. Futbolzaleen beste ‘hit’ bat…

2015-02-23  //  Futbola  //  Iruzkinik ez

Sokak ez du etenik… Atzo indarkeria matxistari gorazarre egiten dioten Betiseko zaleen kantu lotsagarriez mintzo baginen, lankide batek beste bideo hau helarazi dit gaur. Pasa den asteartean Pariseko metroan hartutako irudiak dira. Bagoi barruan Londongo Chelsea futbol taldeko jarraitzaileak daude –PSGren aurkako partida ikustera joanak–. Herritar beltz bat barrura sartzen saiatzen da, baina ez diote lagako…

(gehiago…)

“Puta bat zen; ongi egin zenuen”. Indarkeria matxistari gorazarre Betisen zelaian

2015-02-22  //  Futbola  //  Iruzkinik ez

Indarkeria matxistari gorazarre egiten diote Betis futbol taldeko ultrek, haien taldeak etxean jokatzen duen aldiro. Euren kantuekin Ruben Castro jokalaria animatu nahi dute, tratu txarrengatik auzipetua dagoena, bost salaketa medio.

Izugarria da letra: “Rubén Castro ale, Rubén Castro ale, no fue tu culpa, era una puta, lo hiciste bien”. (Rubén Castro ale, Rubén Castro ale, ez zen zure errua izan, puta bat zen, ongi egin zenuen”)

https://www.youtube.com/watch?v=MyBGJN3XGBk

Ostiralean aipatu genuenez, hainbat futbolarik homofobiaren aurkako ortzadar koloreko sokak eraman dituzte asteburu honetan. Eta orain zer, eta Betiseko zale batek grabatutako irudiak (otsailaren 8koak dira) iristen zaizkigu… zer aurpegi jarri ere ez dakigu.