Eka25 0

Saridunak eta sarigabeak

Indian monzoiekin gutxitzen dira ezkontzak, ekaina aldera. Euri sasoiari ez diot agurrik esan Euskal Herrira etorrita, ezta bodorrio sasoiari ere: Hurrengo astean dut bat Zumaian; eta duela hilabete joan nintzen lehenengoz ezkontza indiar batera. Ezkontza horretako argazkiekin joango da oporretara Sareedunak eta sareegabeak bloga. Udako etenaldia izango da.

Bodorriyua indiar erara

Yogeshek eta Prajaktak ezkondu aurretik behin bakarrik ikusi zuten elkar, hitz emateko zeremonian, ezkontzeko pozik ziren biak eta gurasoen aukeraketarekin konforme.

: Ezkontzarako saree arrosa janzten, eskerrak Surekak lagundu zidan!

: Bikotea aldarean ezkontza errituak egiten, hauek ere kamarez inguratuta, hemengo ezkontzen pare.; Bollywoodeko izarrak dirudite.

: Sua piztea da lehen pausoa, su sakratua da eta ezkonberrien lotura sendotzen du.

: Ezkonberrientzat opariak: lapikoak, telebista, ontziak… Gutun-azalik ez da ematen han.

: Gonbidatuak aldare parean, ezkontza errituei begira, edo berriketan, edo bazkaltzen, edo argazkietan irteteko zain… Jendea ez dago errituari oso adi, ezta?

: Yogeshek bindia margotzen dio Prajaktari begizkotik babesteko.

: Arropa eta apaingarri desberdinekin, baina hemengo ezkontza bildumetan ez da horrelako argazkirik falta!

: Ezkonberriekin argazkia. Ezkerreko emakumeari begiratu, gogoratzen Sushilarekin?

: Emaztegaiak bizi berrirako pausoa irudikatzen du koxka hau igota.

: Ezkontzekin ohituta daude indiarrak eta aldareko errituak ikusi baino, nahiago dute lasai bazkaldu.

: Puztutako arroza sutara botatzen dute, eskaintza modura.

: Foko argitan, bi ordu iraun zituzten errituek.

: Ezkontza legalizatzeko bikoteak zazpi buelta eman behar ditu suaren inguruan, euren lepokoak lotuta daudela.

: Ezkonberrientzat opariak: ohea, jakiak, sofa…

Hamar emakume, hamar historia eta hamaika sentimendurekin bete dugu bloga. Bide, helburu eta jatorri desberdinekoak. Maitasunagatik joanak, laguntza emateko etorriak eta laguntza behar dutenak. Aberatsak eta pobreak. Amak, alabak eta amamak. Eta hauekin ixten dut bloga udako oporretan.

Uda etxealdean pasako dut, Euskal Herrian. Hemen ere emakumetxo bat jaioko delako eta besotan hartzeko irrikitan nagoelako.

Irailarekin itzuliko naiz Indiara, irailarekin ezagutuko ditugu Indiako emakume gehiago, sareedunak eta sareegabeak, saridunak eta sarigabeak.

Saridunak eta sarigabeak

Iruzkina idatzi Baztertu erantzuna

Mari Artano

Azken bidalketak

Iruzkin berriak

Artxiboak

Kategoriak

Meta