10 liburu + 10 liburu

Atalak: Sailkatu gabea

Atzoko zerrendaren jarraipena.

11- Odriozola, J.M, Euskalgintzaren lekukoak: Odriozolak liburu honetan bilketa lan potoloa egin zuen. 500dik gora euskaltzaleen iritziak batu zituen eta ez hori bakarrik. Iritzi horien arteko loturak bilatu zituen eta bere ekarpen propioak egin zituen. Liburu mardula eta polemikoa.

12- Otegi, M. Zergatik euskaraz. Goierriko euskaltegietako ikasleen motibazioak: Maite Otegik ikerketa lan bat egin zuen Goierriko euskaltegietako ikasleen artean, euskara ikasteko zituzten motibazioak ezagutze aldera. Horien bilduma da lan hau.

13- Sole i Camardons, Soziolinguistika gazteentzat: soziolinguistikaren errekan hankak eta paparra bustitzeko liburu egokia da. Diblugazio lana da, soziolinguistikaren oinarrizko kontzeptuak eta paradigmak azaltzen dituena.

14- Unanue, A., Administrazioko atal elebidunetan langileen hizkuntza ohituretan eragiteko plana: ikerketa-ekintza baten ondorioa da liburua. Aitor Unanuek Lasarteko udalean egindako planaren nondik norakoak azaltzen ditu. Izandako aurrerapausoak, lortutakoak, lortu ez zirenak, … Gure herrian praktika asko egiten dira, baina horien gaineko teorizazio gutxi. Eta liburu hau praktikaren gaineko teorizazio txikia egin gura izan zuen.

15- Usarralde, I., Martinez de Luna, I, Euskal hizkuntza komunitatearen bizindar etnolinguistikoa: Andoaingo, Arrasateko, Bergarako, Hernaniko eta Lasarte-Oriako udalerriak. Euskal Herriko bost herritako bizitasun etnolinguistikoa neurtu zuten eta horren emaitza da liburua. Pena ordutik beste neurketarik egin ez izana.

16- Anaut, D, Txokotik zabalera: liburu irakurterraza, laburra eta umorezkoa. Benetako harribitxia lan serio eta askotan aspergarri hauen artean. Euskararen normalizazioa hartzen du gaitzat, eta umorez zipriztintzen ditu bazterrak. Umorea ona ei delako pentsarazteko.

17- Zenbait autore, Soziolinguistika eskuliburua: liburu mardula, erreferentziazkoa. Orain dela gutxi argitara eman du Klusterrak liburua. Soziolinguistikaren ikuspegi orokorra ematen du, adar denak batzen ditu eta euskaratik abiatutakoa da. Nire ustez, akademikoegia bada ere, dibulgazio lana egiteko ere baliagarria izan daiteke.

18- Larrea, T, Euskaldungoa erroizturik: euskararen historia sozialari ekarpena egiten dio Txema Larrreak liburu honetan. Euskal komunitatearen higatzea eta gesaltzea aztertzen du Txemak. Hala ere, hizkera berezia darabil basauritarra izateko, baina tira baleko liburua da.

19- Jauregi, P., Gazteak eta euskara Lasarte-Orian (II): ikerketa lana egin zuen bigarrengoz Pellok Lasarten. Liburu honek berebiziko ondorioa ekarri zuen bere garaian. Batzuek barruntatzen zuten hipotesia egiaztatu zuen: amaren hizkuntzak berebiziko garrantzia duela gazteengan, aitaren hizkuntzak baino dezente gehiago. Horregatik bakarrik merezi du zerrenda honetan egotea.

20- Plataforma per la llengua, Emun, Zer egin …?: orain gutxi plazaratutako liburutxoa da hauxe. Katalunian aurretik argitaratu bazen ere, euskaraz eta Euskal Herriari egokitua oraintxe argitaratu da. Autolaguntza liburua da, gaur egungo joerekin bat. Euskaraz eroso nonahi eta noiznahi egiteko pistak, zantzuak eta trikimailuak ematen dizkigu.