Ametsak ereingo ditugu
Urriaren 11n Derion izango da Topaeguna. Buru belarri gabiltza antolaketa lanetan eta egun itxurosoa egingo dugulakoan nago.
Topaegunaren barruan ekintza berezi batzuk izango dira. Horien artean, Berbak erein deitu duguna. Eta zer da?
Goizean, harrera ekitaldiaren baitan, euskaltzaleon berbak eta ametsak erein nahi ditugu Derioko lurretan. Horretarako Euskal Herriko euskaltzale elkarte guztien berbak/hitzak jaso nahi genituzke, ondorengo galderari erantzunez:
“Nolakoa nahi duzu euskararen egoera zure herrian 15 urte barru?“
(Erantzunaren ondoan, herriaren izena jarri)
Ekitaldian, jasotako amets eta berba guztiak ereingo ditugu, 15 urte barruko TopaEgunean (Derion egitea aurreikusi da) berriro ere atera eta ametsak zein neurritan bete diren ikusteko.
Berbak ekitaldira ekarri edo aurrez bidali daitezke, gutunean edo e-posta bidez:
Gutunak: Euskaltzaleen Topagunera (Landako elkartegia. Landako etorbidea 4, 103. bulegoa. 48200 Durango)
E-postak: info@topagunea.org
Ideia itzela da hori gero!
Ondo legoke, herri bakoitzeko elkarte edo euskaltzale edo Deriora urreratuten danak, herri horretako hazi batzuk be ekartzea. Haziok ereinda, 15 urte barru ikusiko dogu zelan ernatu diren…. ahal dala, zuhaitz edo arbola haziak izatea onena… ostantzean porru landara, tomate eta indabak hamabost urte barrurako zimeldu egingo dira eta!