Kaixo maitia (bis)

Atalak: Info 7

Originala Info7 irratian. Entzun nahi baduzu, hemen:

Sozializazioak ezartzen du, hein handi batean, hizkuntza baten bizitasuna. Sozializazioa zelakoa, bizitasuna halakoa. Edo hori dino beste berba batzuekin, behinik behin, Joshua Fishman soziolinguista handiak. Etxeko transmisioa, gertuko komunitatea eta auzoa dira edozein hizkuntzaren biziberritzearen gako haren ustez. Sozializazioaren zutabeak, hain zuzen ere.

Baina zer ulertzen dugu sozializazioaz? Paula Kasaresek ekarri zuen kontzeptua gure soro soziolinguistikora orain dela urte batzuk, bere doktore-tesiaren bitartez. Tesian, ordura arte, barra-barra gurean erabilitako transmisioa gainditzeko ohartarazi gintuen Paula Kasaresek. Oso kontzeptu estatikoa baita: gurasoek seme-alabengana, norabide bakarrekoa eta seme-alabei agentzia aitortu barik. Hori dela eta, berak sozializazioaz egiten du berba. Dinamikoa da sozializazioa, goitik beherakoa bai, baina behetik gorakoa eta berdinetik berdinera ere, norabide askotakoa, hain zuzen ere. Eta seme-alabek agentzia dute eta berritasunak ekartzen dituzte etxera, etxeko berbetara.

Hori da labur zurrez azken urteotan gurean apurka-apurka bidea egiten ari den delako sozializazio hori. Hala ere, kontzeptuan sakontzeko asmoa baduzue, sarean ibili handik eta hona eta topatuko dituzue azalpen gehigarriak honen inguruan.

Orain gutxi, Iñaki Martinez de Lunak bigarren sozializazioaz egin digu berba (Txepetxen ibilbide kulturalaren tankerako terminoa litzateke, nire ustez). Eta bigarren sozializazio hori euskarara ekartzeko mintzalagun edo berbalagun mugimenduek eduki dezaketen pontentzialitateaz ere jardun du Iñakik.

Hala ere, nago bigarren sozializazio hori nahiko estu ulertzen dugula (ulertzekotan) eta ahaztu egiten zaizkigu bigarren sozializazio horretan potentzialitate handia eduki dezaketen bestelako kontu batzuk ere. Adibidez, aisialdi euskaldunak izan dezakeen indarra (helduontzako aisialdiaz ari naiz).

Gaur, izan ere, Kaixo maitiari buruz berba egitera nentorren, baina hona heltzeko sekulako itzulbira egin dut. Eta zer da Kaixo maitia? Ba, euskaldunak harremanetan jartzeko interneteko zerbitzua. Harremanetan jarri harremanak izateko, jakina, hau da, han eta hemen dauden ligatzeko beste zerbitzu bat da. Baina … euskarazkoa da eta pentsatu gura dut zerbitzu horretan elkar ezagutzen duten pertsonek natural samar egingo dutela euskaraz euren artean (zerbitzuaren helburuetako bat horixe baita).

Dagoeneko 10 urte egin ditu Kaixo maitiak. Eta, euren datuen arabera, 5.000 pertsonatik gora eman dute izena euren zerbitzuan (harreman batzuk sortuko ziren 5.000 horien artean, ezta? Harreman berriak eta, seguruenik, euskarazko harreman berriak). Eta, gainera, sexologiari buruzko blog aktibo samar dute euskaraz (eta hori ere ez da gutxi).

Zerbitzu hau gurean hain sarri egin diren transmisio kanpaina horiek baino eraginkorragoa ez ote da? Ahalmenik banu, zerbitzu honetan inbertituko nituzke transmisio kanpainetako diruak, baina ez dut …