Aktibatu

Atalak: Info 7

Entzuteko Info7 irratian edo hemen:

eta irakurtzeko jarraian:

Aktibatu, ak-ti-ba-tu. Badirudi berba hau izango dela ikasturte honetan berba nagusia euskalgintzan. Euskaldunak aktibatu, zehatzago esatearren. Ekintza solteak egitetik aktibazio kolektibo antolatuan murgildu, beste berba batzuekin esateko.

Horren harira, Bagera elkarteak kaleratu dituen bi gida-liburu ekarri nahiko nituzke irratizaleen belarrietara: Nola egin dute eta Ekitea da kontua. Hauek dira gida-liburu hauen izenburu iradokitzaileak.

Lehenengoak (Nola egin dute) hizkuntza ohituretan eragiteko hainbat herritan egindako proiektuak dakartza orriotara: Egia, Arrigorriaga, Agurain, Trapaga, Hernani, Añorga eta abarretan egindako proiektuak. Bigarrenak (Ekitea da kontua), ostera, aktibaziorako gida izan nahi du. Edonork martxan jarri nahiko balu honen tankerako proiekturik bere herrian, aktibazio gida honetan agertzen dira zehatz-mehatz jarraitu beharreko pausoak, kontuan hartu beharreko puntuak eta beste hainbat datu argigarri.

Gidaliburu bi hauek oinarri egokia jarri dute, nire iritziz, honen moduko egitasmorik martxan jarri gura duen edonorentzat, eta hartuko dugu aintzat, udagoien honetan horrelakoetan murgildu asmo dugunok, behinik behin. Aspalditxo aipatu barik dudan soziolinguistika domestikoaren bidean, beste bi harri koxkor jarri dituzte Bagerakoek, bejondeizuela!

Esan dudan legez, arreta bereziz irakurri ditut  uda honetan gidaliburu biak. Eta handik eta hemendik apunteak hartu ditut, ideiak, kontuan hartu beharrekoak, antolaketari buruzko jakingarriak, finantzazioari buruzkoak, … Eta, tira, honen ostean ahoratuko ditut irakurketa horretatik nire buruan geratu diren burutazio batzuk.

Hizkuntza pedagogia egin behar dela diote aguraindarrek. Pedagogia egin hizkuntzekin, pedagogia egin euskaldunekin, pedagogia egin erdaldunekin, eta erakutsi posible dela. Portaerak matxinatzea eta euskarara ekarraraztea portaera horiek posible dela erakutsi. Jendarteari eta norbanakoei.

Izan ere, proiektu hauek euskara hutsez bizitzeko esperientzia pertsonala ematen dute, inoren zain egon barik iniziatiba hartzeko aukera ematen dute. Hortaz, proiektu hauek euskara hutsezko esperientziak gorpuztu, haragitu egiten dituzte; lehen pertsonan esperimentatzea dute helburu, hain zuzen ere.

Aktibazioak mugimendua dakar, egoera erosoetatik ateratzeko beharra dakar, hizkuntza ohiturak aztertu eta horiei buelta emateko saiakera dakar. Portaera linguistikoak erdigunean jartzen baitituzte proiektu hauek guztiek. Eta hautu pertsonalek eragin soziala dutela agerian utzi dute herri batean baino gehiagotan.

Baina, kontuz, ez gaitezen engaina. Proiektu hauek guztiak ez dira indibidualak, kolektiboak baizik. Aktibazioa erreprodukzio soziala delako. Lehen aipatu dudan Bageraren lehen liburuxkan akabuan aipatzen den bezala: “Egin dezagun. Guk, nork bestela”.