Tosepan 2.4

Atalak: Tosepan

Gosariak Tosepanen batzuetan interesgarriak ere izaten dira. Gaur Jairo Restrepo kolonbiarrarekin gosaldu dugu eta ikaragarri ikasi dugu Kolonbiako nekazaritzaz, lurrikarez eta abarrez. Horren ostean, Blancarekin nuen nik batzarra.

Blanca da Redeseko kidea (Redes por la Diversidad, Equidad y Sustentabilidad) eta Tosepaneko lagunak trebatzen ari da komunikazio kontuetan. Era berean, kooperatiba taldeko komunikazio estrategia osoa lantzen ari da. Batzarra geneukan biok apur bat komunikazioan zelan txertatu hizkuntza lantzeko. Baina hori baino, beste zerbait izan da. Autonomia, kosmobisioa, komunikazio esanguratsua, komunitatea, bizitza sustengatzeko beharra, ardurakidetasuna, maseualak, tamakepalis (auzolana), yeknemilis (biziera ona) eta abarrez jardun dugu, ordubeteko batzar antologikoan (grabatu dut elkarrizketa, lasai eta ganoraz entzuteko berriro ere).

Horren ostean, egurra. Iaz nirekin batera hitzaldia eman zuen Raquel Padilla hil egin dutela jakin izan dugu. Bortizkeria matxistaren beste kasu lazgarri bat, bete-betean jo gaituena hemen. Zutzako doa hau, Raquel! Agur eta ohore!

Eguerdi-arratsaldean erakundetzeari buruzko proposamena doitu, findu eta eraberritu genuen Liz, Gatxi eta hirurok, maistraki findu ere. Ea domekan zer esaten diguten.

Arratsalde-gauean afaldu genuen Cuetzalanen, eta Kolonbiako Caliri buruz, Brasil eta Lula, Euskal Herria eta Katalunia. Eta abar: feminismoa, hizkuntzen biziberritzea, sozialismoa eta ezkerra, Podemos eta abar.