Tosepan 2.5

Atalak: Tosepan

Zapatuan egun librea eduki genuen, baina, hala ere, goizean goiz Tosepanek kudeatzen duen irratian elkarrizketa egin ziguten Gatxiri eta bioi. Eguna nawat eta tutunakuen kulturan murgiltzen eman genuen, euren lorratz arkeologikoak ikusten, euren lore eta landare eta arbolak ezagutzen lorategi botanikoan, eta Cuetzalango marabilla naturalak gozatzen (ur-jauziak eta abar).

Domeka, berriz, Tosepaneko aholkulari nagusiarekin hasi genuen, batzarrean. Harekin planaren nondik norakoak, Euskal Herrian egindako egonaldiak eta bestelakoak landu genituen Gatxik eta biok. Mamitsu eta indartsu joan da batzarra eta, gure ustez, egonaldi honen bilakaeran mugarria jarri du batzarrak (nahiz eta ikusi beharko).

Plan hauen ibilbidea marrazten jarraitu dugu horren ostean, Tosepantahtol-eko lagunekin (planaren inguruan eratu den talde motorrarekin, alegia). Erakundetzea landu dugu eta planaren ikuspegiaren nondiko norako batzuk marraztu. Era berean, hurrengo aste potoloaren hitzorduak eta zitak errepasatu ditugu.

Arratsaldean urrunetik jarraitu dugu apur bat hauteskundeen berri, gure herrietako datuak eta bestelakoak komentatu, hurrengo asteko lanak prestatzearekin bat. Gure egonaldiaren erdia pasatu da dagoeneko, eta galtzak bete lan dugu oraindik gure begi aurrean. Jarraitu beharko dugu kontzientziak lehertzen (“detonar conciencias” esan du hemengo batek) hurrengo astean ere.

Gaurko esaldia (Alvarok esana): “mundua amildu arren, ezin dugu esan ezinezkoa dela. Jarraitu behar dugu”.