Printzak

Atalak: Sailkatu gabea

Bat aldizkariaren 118. zenbakia Ipar Euskal Herriari buruzko monografia da. Artikulu zeharo interesgarriak eta gomendagarriak daude (azken aldion ekimen oso interesgarriak dabiltza mugitzen handik, ez bakarrik hizkuntzaren alorrean). Nik, hala ere, bereziki azpimarratuko nuke Xan Airek idatzitako “Motibazio sozialaren printzak”. Ez dut egingo horren gaineko laburpenik, printza batzuk baino ez ditut ekarriko.

Batetik, ekarri nahiko nuke Uztaritzeko ikastolan egindako interbentzioa. Patioa eraldatu dute han eta, horren ondorioz (besteak beste), euskararen erabilera igo da ikasleen artean. Hau da, baldintzak aldatuta, erabilera areagotzea lortu dute. Aztertu beharko da aldaketa hori eta, beste leku batzuetara transferitzeko modukoa denez, ba hasi beharko da han eta hemen esperimentatzen.

Bestetik, ohar txiki batzuk sakabanatuta ekarriko ditut. Hizkuntza gorputzetik pasaraztearen garrantzia dakar egileak. Baita herri kulturak Ipar Euskal Herrian duen garrantzia ere (libertimenduak bereziki aipatuz). Artigal metodoa ere aipatzen du. Eta auzolaguntzarako eratutako Erabil kolektiboa ere. Ohiturak aldatzeko ingurunean mintzagramak egiteaz ere jardun du. Eta abar.

Amaitzeko, esaldi bat ekarriko nuke: erabilera da termometro eta termostato. Irakurri ezazue artikulua (edo ez, zuek ikusi) …