“Errausketak badu alternatibarik”, Mikel Izagirreren iritzi artikulua

Atalak: Iritziak / Adierazpenak

“Berria” egunkarian Mikel Izagirrek “Errausketak baditu alternatibak” izeneko artikulua plazaratu du. Mikel Izagirre Urnietan errauskegiaren kontra eta autobide berriaren alternatibaren alde lan egin duen
“Arnasa” taldeko kide izana da, eta gaur egun Urnietako alkatea da eta Ezker Batua-Berdeak taldearen buru Gipuzkoako Batzar Nagusietan.

Irakurri osorik:

Errausketak baditu alternatibak

Mikel Izagirre

Gipuzkoako Batzar Nagusietako Ezker Batua-Berdeen eleduna

Azken aste eta egun hauetan hainbat buruzagi politiko eta erakunderen adierazpen eta informazio sail bat argitaratzen ari da zenbait hedabidetan, eta adierazpen eta informazio horiek alarma soziala pizten
ari dira. Informazio horiek errausketa aurkezten dute hondakinak tratatzeko aukera bakar gisa, eta pentsarazten dute errausketarik gabe Gipuzkoa hondakindegi erraldoi bihurtuko dela 2009. urtean.

Erabat onartezinak iruditzen zaizkigu adierazpen horiek, haien helburu bakarra gipuzkoarrak beldurtzea baita, eta, gainera, errealitatetik urrun baitaude.

Horregatik, idatzi honen bitartez, batetik lasaitasunerako deia egin nahi diet herritarrei, eta bestetik, azaldu nahi diet errausketaz gain beste aukera gehiago daudela, nahiz eta batzuk kontrakoan tematzen
diren, auskalo zein interes alderdikoirengatik, eta inkoherentzia handiak esaten dituzten.

Miguel Buen sozialista da horietako bat. Bueni gogorarazi nahiko nioke, Batzar Nagusietan egin zen Inbestidura Saioan, ahoan bilorik gabe esan zuela ez ziola beldurrik errausketari buruzko herri galdeketa egiteari. Bertan ginen guztiok entzun ahal izan genion hori. Orain, badirudi, hitza jaten hasi dela, denbora eta pertsona askoren lana bazterrean uzteaz mintzatzen hasi baita. Zer ulertu behar dugu, orduan? Ez zuela herri galdeketarik egiteko inolako asmorik? Edo ez zuela galdeketaren emaitza onartzeko asmorik baldin eta herritarrak errausketaren aurka azalduko balira? Ondorio batera garamatzate adierazpen horiek: Miguel Buenek ez du inolako erreparorik herri galdeketa proposatzeko, horrek Ahaldun Nagusi izatera badarama; gero hitza jango du. Bada, hori herritarrak engainatzea eta iruzur egitea da, hori erantzukizunaren utzikeria egitea da.

Bada egin nahi dudan beste aipamen bat. Hain zuzen ere, Sasieta Urola Erdi eta Urola Kostako mankomunitateek egindako oharraren gainean. Errauste planta egiteko akordioa hausten bada, San Markos mankomunitateak haietan hondakinak ezin izango dituela utzi ohartarazi dute. Hondakinen tratamenduaren gainean gipuzkoar guztiak mesedetuko dituen adostasun sozialaren bila aritu beharrean, haien kokapen zirkunstantzialak erabiltzen saiatzen dira beren irtenbideak inposatzeko asmoz, gipuzkoar guztien borondatearen gainetik.

Baina, zehaztapen horiek egin eta gero, iritzi publikoari eta gipuzkoar gizarteari mezu hau helarazi nahi diet: errausketa ez da beharrezkoa; errauste planta eraikitzen ez baldin bada, Gipuzkoa ez da inondik inora zabortegi bihurtuko, eta errausteaz gain badira beste aukera batzuk, haien bitartez, gainera, Gipuzkoa eramangarriagoa izango da ingurumenari begira, eta osasuntsuagoa ere bai.

Alternatiba horien oinarriak hauek dira: hondakinak murriztea, berrerabiltzea eta birziklatzea; materia organikoa konpostatzea jasotzen den lekuan bertan aurrez hautaketa eginda, eta hondakinen
bilketa atez ate egitea.

Hori dena ez du Ezker Batua-Berdeak taldeak bakarrik esaten. Gipuzkoako Foru Aldundiak antolatuta -ez da inolaz ere erakunde susmagarria- gai honen inguruan egin diren azken jardunaldietan adituek frogatu eta berretsi egin zuten Errausketaren Aurkako Koordinadorak planteatu dituen proposamenak erabat bideragarriak direla.

Orain, Gipuzkoako udalek eta mankomunitateek hartu beharko dute erabakia. Gipuzkoako Foru Aldundiak errespetatu egin beharko du erabaki hori, Markel Olano diputatu nagusiak kargua hartzeko orduan hitzeman duen bezala. Udalerri eta mankomunitateek dute giltza Gipuzkoan hondakin solido urbanoen kudeaketa egoki eta eramangarria martxan jartzeko.

Errausketa ez da beharrezkoa; errauste planta eraikitzen ez baldin bada, Gipuzkoa ez da zabortegi bihurtuko, eta errausteaz gain badira beste aukera batzuk; haien bitartez, gainera, Gipuzkoa eramangarriagoa izango da ingurumenari begira, eta osasuntsuagoa