Errausterik gabeko plana jarriko du indarrean San Markoseko mankomunitateak

Atalak: Errausketa, Gipuzkoa

San Markoseko Mankomunitateak zuzendaritza berria hautatu du eta EB eta EAE-ANVko kudeatzaileek aurreko legealdian hiri hondakinak kudeatzekoaukeratutako moduari buelta eman nahi diote Errauste plantarik gabeko plan alternatiboa lantzen hasiko dira laster.

Prentsaurreko batean Ricardo Ortega mankomunitateko lehendakariak ( EB ) eta Imanol
Azpiroz lehendakariordeak (EAE-ANV) egitasmoaren berri eman dute.

Orain arteko hondakinen kudeaketa irauli egin nahi du San Markosko gehiengo berriak (Berria)

Errausterik gabeko plana jarriko du indarrean mankomunitateak, «ahal den herri guztietan»

i. pETXARROMAN

Donostia

Aurreko legealdian hiri hondakinak kudeatzeko aukeratutako moduari buelta eman nahi dio San Markosko Mankomunitateko zuzendaritza berriak. Hala, errauste plantarik gabeko plan alternatiboa lantzen hasiko da, ahal duen herri guztietan.

EAE-ANVk eta Ezker Batuak akordioa lortu dute hiri hondakinak kudeatzen dituen Gipuzkoako mankomunitaterik handiena zuzentzeko. Atzo Ricardo Ortega mankomunitateko lehendakariak
( EB ) eta Imanol Azpiroz lehendakariordeak (EAE-ANV) bi alderdiok hitzartu duten programaren berri eman zuten.

Lehenengo urratsa sortzen diren hiri hondakinak gutxitzea izango da. Horretarako, herritarrak kontzientziatzeaz gain, neurri politikoak hartuko dituzte hondakin bilaka daitezkeen gauzak berrerabiltzeko.

Hondakinak birziklatzea izango da hurrengo urratsa. Horretarako, gaikako bilketa sustatu eta bultzatu nahi du San Markosko Mankomunitateak. Hala, materia organikoa bereizita bilduko dute, konpostatze plantetan tratatzeko. EAE-ANVk eta EBk atez ateko bilketa egin nahi dute, konpostaren kalitatea bermatzeko. Izan ere, bi alderdiok lortu duten akordioak Gipuzkoako herri eta eskualdeetan  konpostatze planten sare bat osatzea jasotzen du.

Azpirozek eta Ortegak onartu zuten beti geratuko dela konpostatu, berrerabili eta birziklatu ezin daitekeen hondakin kopuru bat. Horiek biltzea aurreikusten du San Markosek, hondakindegietan. «Hondakin inerteak izango dira, ez usain, ez lixibiaturik ez dutenak. Kudeatzeko erraza da, eta ez du eragozpenik sortzen».

San Markosko zuzendaritza berriak gertutasun printzipioa zaindu nahi du. Izan ere, zaborrak sortzen diren lekuan bertan kudeatu behar dira, EAE-ANV eta EBren iritziz.

Plan hori martxan jarrita, errauste planta ez dela beharrezkoa izango ziur daude San Markos zuzentzen duten ordezkariek. «Gipuzkoako Hiri Hondakinak Kudeatzeko Planak helmuga bat zuen: errauste planta egitea, eta hondakinen kudeaketa guztia horren sokan antolatuta zegoen. Guk hasieratik hasi nahi dugu hondakinak kudeatzeko prozesua, errauste planta alferrikako bihurtzen», esan zuen Ortegak.

HURRENGO URTEAN. Dagoeneko aurrekontuak ari dira antolatzen udaletan hurrengo urteari begira, eta, hain zuzen ere, hurrengo urtean hasiko dira hondakinak kudeatzeko plan berria martxan jartzen, Azpirozek adierazi zuenez. Gogorarazi zuen San Markosko eta Debagoieneko mankomunitateak
zuzenduko dituztela erraustearen aurkako alderdiek: «Gipuzkoako herritarren %53 ordezkatuko ditugu. Galdetu nahi diot Markel Olanori, ea hauteskundeetan esan zuen bezala, gehiengo hori errespetatuko duen».

«Hasieratik hasi nahi dugu hondakinak kudeatzeko prozesua, errauste planta alferrikako bihurtzeko»

Giza katea egingo dute igandean

Azken urteetan bezala, Errauste Plantaren aurkako Gipuzkoako Herri Plataformen Koordinakundeak giza katea antolatu du datorren igandean, goizeko 11:30ean Donostiako Kontxako hondartzan.

Koordinakundeak «oso momentu erabakigarritzat» oraingoa. Hala ere, azpimarratu du inoiz
baino «gehiago» behar dela herritarrek parte hartzea: zabor gutxiago sortzeko, zaborra gaika sailkatzeko eta mobilizatzen jarraitzeko.

Koordinakundeak nabarmendu du hainbat udal eta mankomunitatetan erraustearen aurkako
gehiengoak osatu direla. Hala, horiek gipuzkoarren %53 ordezkatzen dituztela gogorarazi du. «Horiek eredu bihurtu beharko dute, zaborraren kudeaketa beste modu batera eginez. Ez dakigu nahikoa izango den politikari berriek euren jarrera aldatzeko».

Halaber, Arazuriko biometanizazio plantaren aurka Espainiako Auzitegi Gorenak eman berri
duen epaia nabarmendu du koordinakundeak, planta bertan behera utzi baitu hirigunetik bi kilometrora baino gutxiagora egoteagatik.