EAEko Hiri Hondakinen Koordinazio Organoan hondakinen tratamendurako irizpideak bateratu dituzte

Atalak: Sailkatugabeak

Eusko Jaurlaritzak eta EAEko hiru diputazioek osatzen duten Hiri Hondakinen Koordinazio Organoaren baitan, Hondakinak Planifikatzeko eta Kudeatzeko Irizpideak bateratu berri dituztela jakinarazi da
komunikabideetan. Erakunde horretan adostasunera iritsi ondoren, herritarren ekarpenak jasotzeko epea zabalik dago urriaren 31a bitartean. “Berria” egunkariak titulatu du “Hondakinak kudeatzeko irizpideetan ados jarri dira Jaurlaritza eta aldundiak ” eta ” Gara “k ” Hiri hondakinak kudeatzeko herritarren ekarpenak jasoko ditu Lakuak urrian “.

Hondakinak kudeatzeko irizpideetan ados jarri dira Jaurlaritza eta aldundiak (Berria)

Euskal Autonomia Erkidegoko (EAE) Hondakinak Planifikatzeko eta Kudeatzeko Irizpideak bateratu dituzte Eusko Jaurlaritzak eta Arabako, Bizkaiko eta Gipuzkoako Foru Aldundiek. Hala, herritarrak informatzeko eta haienzuzenketa zein ekarpenak biltzeko epea zabaldu dute, hilaren 31 artean.

Hiri hondakinak planifikatzeko eta kudeatzeko irizpideek bere eginten dute 2002-2020eperako Europako Legediak hiri hondakinen inguruan egiten duen tratamendu hierarkia. Hala, hondakinak kudeatzeko lehentasuna ematen dio prebentzioari, eta ondoren berrerabilpena eta birziklatzeari.
Ondoren, bestelako balioztapen ekinbide batzuk jasotzen ditu, eta, azken postuan, desagerraraztea.

Ingurumen eta Lurralde Antolamendu Sailak jakinarazi duenez, irizpide horiek ere jasota daude
2002-202o eperako Garapen Iraunkorrerako EAEko Ingurumen Estrategiaren barruan.

Euskal Autonomia Erkidegoko Hiri Hondakinen Koordinazio Organoan lortu dute erakundeek. Egitura horien Eusko Legebiltzarrak eskatuta eratu dute Jaurlaritzak eta hiru aldundiek.

Zuzenketak bildu eta gero, betiko irizpideak finkatuko dituzte, eta haiek baliagarriak izango zaizkio Koordinazio Organoari programa eta ekintzak zehazteko, betetzen direla bermatzeko eta ikerketa arloak
identifikatzeko. Halaber, gai horri buruz foru aldundietan eta udalerrietan aurrera eramaten dituzten ingurumen politikak bateratu egingo dira.

Eusko Jaurlaritzak jakinarazi duenez, %17 handitu da hamar urtetan Arabako, Bizkaiko eta Gipuzkoako herritarrek sortutako hondakin kopurua. 1995ean 976.154 tona sortu ziren, eta 2005ean 1.165.799.

Hiri hondakinak kudeatzeko herritarren ekarpenak jasoko ditu Lakuak urrian (Gara)

Lakuako  Ingurumen eta Lurralde Antolamendu Sailak biztanleen ekarpenak jasotzeko epea ireki du. Urriaren 31 bitartean biltzen dituen ideiekin etxeko hondakinak kudeatzeko dokumentua osatuko du.

GARA |

Etxean sortzen den zaborra nola tratatu behar den zehazteko asmoz, Lakuako Ingurumen eta Lurralde Antolamendu Sailak informazio publikorako aldiari hasiera eman dio, gaiaren inguruan lanean  diharduten erakundeekin dokumentu bat adostu ondotik. Hiri hondakinen koordinazio organoaren barrenean lortu dute adostasuna; Gasteizko Legebiltzarrak eskatuta eratu dute organo hori eta Ingurumen eta Lurralde Antolamendu Sailak, Arabako Aldundiko Hirigintza eta Ingurumen Sailak, Bizkaiko Aldundiko Ingurumen Sailak eta Gipuzkoako Aldundiko Garapen Iraunkorreko Sailak osatzen dute.

Biztanleen ekarpenak jasoko dituzte urriaren 31 arte, eta ondoren idatzi bat osatuko dute guztiekin. Bertan zehaztuko dute nola kudeatu behar den etxeetako zaborra, baita saltokietan sortu eta hiri hondakin gisa tratatzen dena ere.

Lakuako Ingurumen eta Lurralde Antolamendu Sailak azaldu duenez, dokumentua baliagarria izanen da aipatutako organoak «proposatutako programak eta ekintzak koordina ditzan, betetzen direla
berma dezan eta balizko ikerketa arloak identifika ditzan». Hala, gainera, «aldundietan eta udalerrietan garatzen diren ingurumen politikak bateratu ahal izanen dira».

Hiri hondakinak kudeatzeko jarraibideek Europako legediak zehaztutako hierarkia agindua betetzen
dutela adierazi du Lakuak; horren arabera, prebentzioak izanen luke lehentasuna, eta gero izango lirateke berrerabilpena, birziklatzea, balioa emateko bertze ekintza batzuk eta, azken tratamendu aukera, ezabatzea.

Araban, Bizkaian eta Gipuzkoan, pixkanaka-pixkanaka hiri hondakin gehiago sortzen joan da azken urteotan. Ingurumen eta Lurralde Antolamendu Saileko azken datuak horren erakusgarri dira:
1995ean 976.000 tona sortu ziren eta 2005ean, 1.165.000. Beraz, denbora tarte horretan pertsona bakoitzak sortutako zabor kopurua %17 igo da. Zenbaki horiek txikitzeak klima aldaketan eragin txikiagoa izatea ekarriko luke, Lakuaren arabera.