Azpeitian ekainean hasiko dira hondakin organikoak biltzen 26 kontainer berezitan

Atalak: Bost kontenedore, Gaikako bilketa

Azpeitian 400 familia baino gehiagok eman dute hondakin organiko gordinak kontainer berezietan uzten hasteko. Lapatxeko zabortegian konpostatzeko sistema prest jarri du Urola Erdiko mankomunitateak eta bertara eramango dituzte Azpeitiko kaleetan edukinontzi marroi berrietan bilduko diren hondakin konpostagarriak. “Noticias de Gipuzkoa“k eman du albistea.

Materia organikoa jasotzeko 26 ontzi ezarriko ditu Urola Erdiko Mankomunitateak Azpeitian
Informazioa eta materiala banatzeko bilerak egingo dituzte ostegunetik larunbatera bitartean

Azpeitia. Urola Erdiko Mankomunitateak materia organikoa jaso-tzeko 26 ontzi jarriko ditu Azpeitiko kaleetan. Edukiontzi berri hauen bidez, fruta eta barazki sukaldatu gabeak bilduko dituzte ondoren konposta egin ahal izateko. “Ekainaren hasieran Lapatx zabortegiko konpostaje gunea martxan jarriko dute eta esperientzia pilotuan parte hartuko duen herria da Azpeitia, Azkoitiarekin batera. Orain urtebete inguru, izena emateko epea zabaldu zen konpostajea egin nahi zuten herritarrentzat, eta Azpeitian 400 familia baino gehiagok eman zuten izena”, azaldu zuen Azpeitiko alkateorde den Xanet Esnaolak.

Marroi koloreko ontziak astelehenean hasiko dira jartzen eta orain arte izena eman ez duten herritarrek, astelehena eta osteguna bitartean izena emateko aukera izango dute bulego orduetan 943 670249 telefono zenbakira deituz.

Ostegunetik larunbatera bitartean, berriz, aurrez izena eman dutenentzat eta hurrengo astean ematen dutenentzat informazioa eskuratzeko bilerak antolatuko dira. Hauetan, alde batetik, sailkapena nola egin behar den azalduko da eta, bestetik, materia organikoa etxeetan sailkatu ahal izateko beharrezkoa den materialaren banaketa egingo da, edukiontzi txikiak, kaleetako ontzietako giltzak eta poltsa biodegradagarriak.

Saio guztiak Azpeitiko Enparan Dorretxean izango dira, ostegun eta ostiralean, 9.30etik 13.00etara eta 16.00etatik 19.00etara eta larunbatean, berriz, 9.30etik 13.00etara bitartean.

“Hitzaldi hauek, orduko puntuetan eta erdietan hasiko dira eta bi zatitan banatuta egongo dira. Lehenbizikoan, materiala banatuko da eta bigarrengoan, aldiz, egin beharrekoa azaldu edo informazioa emango da. Kalitatezko konposta lortzea da helburua eta ondo irtetea espero dugu. Orain Azpeitia, Azkoitia eta Donostiako Amara auzoan probatuko da, ondoren, Gipuzkoa osora zabaltzeko asmoa baitute”, agertu zuen Mankomunitateko teknikari den Izaro Sudupek.