Tecnalia garatzen ari da hondakin elektronikoak hobeki birtziklatzeko teknologia berria

Atalak: Birziklajea

Europan gaur tresna elektriko eta elektronikoak zaborretara jaurtiaz sortzen diren miloika tona hondakinetatik %90 zakarretara doaz, besteren artean aparailuek daramatzaten gaiak bereiztea neketsua delako. Horietan diren metalak errezago apartatzeko teknologia garatzen ari da Tecnalia enpresa, gero makina berrietan inplementatu ahal izateko. Enpresadigitala.net guneak eman du albistea.
Tecnaliak ikusmen artifiziala darabil hondakin elektronikoen birziklapena hobetzeko

2008/07/11

Sormen izeneko proiektuaren helburua da hondakin elektronikoetan metalak bereizteko teknologia bat garatzea. Teknologia hori ikusmen multiespektralean oinarrituta egongo da, eta asmoa da birziklatze-instalazioetako prozesuetan txertatzea. Makina berri horrek egungo metodoen mugak gaindituko ditu. Izan ere, egungo metodoetan bereizketa hori eskuz egiten da, eta ezinezkoa da kolore, itxura eta pisu antzekoa duten metalen bereizketa egitea.

Horren harira, konponbide berri bat proposatzen du Tecnaliak, kolore bereko elementuak bereizteko -esate baterako, aluminioa, nikela edo altzairu herdoilgaitza-, betiere material horien birziklapena aprobetxatuz. Aurrerakuntza esanguratsua da bestelako bereizketa-teknikekin alderatuta. Aluminioaren kasuan, adibidez, Tecnaliak garatutako sistema horrekin metal horren % 30-40 gehiago berreskuratuko da.

Gaur egun, 6,5 milioi hondakin elektriko eta elektroniko sortzen dira urtean Europan; % 90 baino gehiago zabortegietara botatzen da.

Hondakin horiek hainbat material-mota dituzte, eta gaur egun erabiltzen den teknologia ez da gai hondakin elektronikoen bereizketa egokia egiteko. Gailu elektronikoak desmuntatzea eskuz egin beharreko lan bat da, eta horrek asko garestitzen du prozesua. Esaterako, telebistetan hodi katodikoak soilik desmuntatzen dira, eta gainerako guztia birrindu egiten da. Bestelako gailuetan, aluminiozko, kobrezko edo burdinazko zatirik handienak bereizten dira, eta gainerakoak bestelako erabileretarako erabil litezke.

Prozesua merkatzeko garrantzitsua da elementuak banan-banan, automatikoki eta suntsitu gabe identifikatzeko gai den makineria garatzea. Gainera, hala, ingurumena ez da horrenbeste kutsatuko eta langileek ez dituzte osasunerako kaltegarriak diren substantziak arnastuko.

Besteak beste burdinaren, berunaren, altzairu herdoilgaitzaren, aluminioaren, plastikoaren edo letoiaren bereizketa egiteko aukerak aztertuz gero, zenbait kasutan posible da horiek espektro ikusgaian bereiztea. Dena den, beste zenbait metal, hala nola aluminioa eta altzairu herdoilgaitza, ezin dira kolorearengatik bereizi.
Identifikazio multiespektrala

Ezinbestekoa da beste zenbait metodo aurkitzea, eta horien artean dago identifikazio multiespektralaren metodoa. Metal puru bakoitzak berezko islatze espektrala du. Zenbait elementu espektro ikusgaian identifikatu daitezke (380-740 nm), hala nola beruna eta kobrea; beste zenbait, berriz, tarte horretatik kanpo.

Kolore-kamerak ez bezala, sistema multiespektralak eta hiperespektralak gai dira bereizmen handiarekin hainbat banda ikusteko, ultramoretik infragorriraino. Aldakortasun horri esker, sistema horiek hainbat material detektatzeko, sailkatzeko eta identifikatzeko gai dira, ikusgaian lan egiten duten kolore-kamerek dituzten mugak gaindituz.

Teknologia-mota horren aplikazioa metalen bereizketaren arazoa konpontzeko ikuspuntu berritzailea eta itxaropentsua da. Izan ere, 2015erako urtean ekoitzitako hondakin elektrikoen eta elektronikoen kopurua bikoiztea aurreikusten da, 12 milioi tonara iritsi arte; aldi berean, ordea, birziklatutako material-kopurua ere nabarmen handituko dela aurreikusten dute (aluminioaren kasuan, adibidez, % 30 eta % 40 gehiago).

Logistikaren, industriaren eta turismoaren sektoreetarako balio erantsi handiko produktuen eta zerbitzuen garapenean aurrera egiteko, IKTen teknologietan oinarritzen du bere ikerketa eta garapena Tecnaliako Infotech Unitateak. Gainera, bestelako sektoreentzako, hala nola automozioarentzako, energiarentzako, telekomunikazioentzako edo administrazio publikoarentzako konponbideak ere eskaintzen ditu, Tecnaliako gainerako unitateekin elkarlanean.

Infotech Unitatearen aplikazio-eremu nagusiak irudien tratamenduarekin, trazabilitatearekin, zerbitzu mugikorrekin, ahotsean oinarritutako zerbitzuekin eta logistika-katearen kudeaketarekin erlazionaturik daude. Aplikazio-eremu horiek ikusmen artifizialaren, teknologia semantikoen, biometriaren, trazabilitatearen eta ahots-ezagutzearen teknologietan lantzen dituzte.

Tecnaliaren Infotech Unitateak ikusmen artifizialaren inguruko proiektuak ikertzen eta garatzen ditu hainbat aplikazio-arlotan; besteak beste, proiektu hauek nabarmentzen dira: hondakinen bereizketa multiespektrala egiteko sistema (SORMEN), lurperatutako elementuak lokalizatzeko georadar eta irudiak prozesatzeko sistema, industria-aplikazioak keinuen eta ahotsaren bidez gidatuko dituen sistema multimodala (INTERAMI) eta ikusmen-arazoak dituzten pertsonentzako display irakurgailua (ONCEren I+Gren nazioarteko saria jaso zuen 2006an).