Oiartzungo konpost makinak ikusten izan dira saltoki handi frantses bateko arduradunak

Atalak: Konpostaketa

Gipuzkoako Oiartzunen laster martxan jarriko diren konpost makika berriak ikusten izan dira Frantziako hiper kate bateko arduradunak. Oiartzungo udalak Haurtzaro ikastolak eta Elizalde herri eskolan ipini ditu makinok, bertako janarien honarrak bertan konspost bihurtzeko. Albistea Diario Vascon azaldu da.
Oiartzungo konposta makinak ikustera etorri dira Frantziatik

EGARRIZ

Oiartzungo konposta makinak ikustera etorri dira Frantziatik
Aipatu Haurtzaro Ikastolako konposta makinari bisita egiten.

Oiartzungo Udalaren eskutik, Haurtzaro ikastolan eta Elizalde Herri eskolan kokatu dira herriko lehenbiziko bi konposta makinak. Izan ere, bertako jangeletan egunean hondakin organiko bolumen handia sortzen da eta beraz, herrian sortzen ditugun hondakinak bertatik kudeatzen hasi asmoz, bi gune horietan alternatiba hau martxan jartzea egokitzat jo zen. Kontutan hartuta orokorrean sortzen dugun zaborraren %80 materia organikoa dela, hori zabortegietan pilatu beharrean, irtenbide jasangarria eman ahal zaio makina hauen bidez konposta sortuz, hau da birziklatuz.
Iragan astean Frantziako supermerkatu ezagun bateko 12 arduradun izan ziren Oiartzungo konposta makinak ikusten eta funtzionamendua ezagutzeko helburuarekin. Haien supermerkatuetan sortzen den materia organiko guzti horrekin arazo handia baitute eta irtenbidea eman asmoz Oiartzungo konposta makinak haienean jartzeko interesa azaldu zuten.

Bertan izan ziren harrera egiten Oiartzungo Udaleko arduradunak (alkatea, zinegotziak eta hondakinen kudeaketarako teknikaria), eta Haurtzaro ikastolako zuzendaria. Udal arduradunek oso positibo baloratu zuten bisitaldia, kontutan hartuz supermerkatu horien dimentsioa eta sortzen duten hondakin bolumen izugarria. Oiartzunen ere bertako supermerkatuek pausu hori eman dezaten harremanetan hasi direla aipatu zuten udal arduradunek. Materia organikoaren birziklapenerako alternatiba hau erreferente bilakatzea oso garrantzitsutzat jo zuten denek.
Aurki jarriko dira martxan Haurtzaro eta Elizalden kokatu diren konposta makinak.

Ezaugarrien artean azpimarra daiteke adibidez konposta makina hauen kokalekua, zaborra sortzen den gunetik gertu daudela eta ondorioz, zaborra sortu eta egun berean konposta makinan sartzen dela materia organiko guzti hori. Makinan sartu eta berehala hasten da martxan birziklapen prozesu biologikoa. Hiru asteren buruan, zabor gisa sartutako materia organiko hura konpostan bihurtzen du makinak. Konposta horrek erabilpen ezberdinak izan ditzake: batetik, eskolek eman ahal dioten erabilpena heziketari begira; eta bestetik, nekazaritzan, zein lorezaintzan ongarri edo simaur gisa.
Oiartzungo Udalaren adierazten duenaren arabera, herrialdeko erakundeek bultzatzen eta defendatzen duten hondakinen kudeaketa sostengaezina da:

«Errauskailuak zabortegiekiko menpekotasuna sustatuko du, eta Hondakinen kudeaketa egokia eta batez ere jasangarria egiten ez den bitartean, garestia izango da zaborra sortzea. Errauskailuak bere funtzionamendurako zaborra behar baitu. Errauskailua eta Birziklapena eredu/apustu Inkonpatibleak dira. Oiartzungo Udalak jasangarria den alternatibaren aldeko apustua egin nahi du, nazioarteko beste herri batzuetan jada martxan dauden eta eraginkorrak diren birziklapen ereduen alde, alegia. Gaur egungo hondakinen kudeaketarekin, ustez birziklatzera botatzen dugunaren herena zabortegietara doa, hau da 3 tonatik bat zabortegira doa. Egiazko birziklapen eredu integrala martxan jarriz gero, ostera, frogatua dago %20a birziklatzetik %80tik gora birzikla daitekeela. Posible ez ezik, beharrezkoa dela iruditzen zaigu. Horretarako herriak hartuko luke hondakinen kudeaketa bere gain eta ondorioz, oiartzuarrak lirateke kudeaketa horren protagonistak. Eredu hau aurrera eramateko, kontziente izan behar dugu norbera dela bakoitzak sortzen duen zaborraren erantzulea eta arduraduna. Ondorioz norbere etxetik hasi behar garela birziklatzen. Bestalde, zenbat eta gutxiago kontsumitu, txikiagoa izango da sortzen dugun zabor kopurua eta ahalik eta gutxien sortzea da gakoa. Eragile eta herritar orok birziklapenaren aldeko apustuan bat eginez gero, egungo %20tik %80a baino gehiago birziklatzera irits gaitezke (Herrialde Katalanetan frogatu den bezala). Oiartzunen kudeaketa eredu hau sustatzearen alde egingo du udalak».