Errausketaren Aurkako Plataforma lanean ari da apiril amaierarako 30.000 sinadura biltzeko

Atalak: Errausketa, Gipuzkoa, Zubieta

Gipuzkoako Errausketaren Aurkako Plataforma lanean gogor ari da apirilaren 30erako 30.000 sinadura lortzeko, Eusko Legebiltzarrak hondakinen lege berri bat eztabaidatu eta onartu dezan, zaborren gaikako bilketa arautuz eta horien errausketa galaraziz. “Berria“ egunkariari erantzun dio Plataformaren bozeramaile Edorta AgirrekUnai Agirre.Unai Agirre, Errausketaren Aurkako Plataformen Koordinakundeko bozeramailea

Errausketaren Aurkako Plataformak 30.00o sinadura behar ditu gaikako bilketa egiteko lege proposamena Legebiltzarrera eramateko.

«Ziur gaude lortuko ditugula zaborrak gaika biltzeko legea sustatzeko sinadurak»

Ainara Arratibel.
Donostia

Araban, Bizkaian eta Gipuzkoan Hondakinen Legea izatearen alde sinadurak biltzen ari da Gipuzkoako Errausketaren Aurkako Herri Plataformen Koordinakundea. 30.000 sinadura bildu behar ditu, proposamena Eusko Legebiltzarrean eztabaida dezaten. Ekimen horren bidez, birziklatzearen eta zaborren gaiako bilketaren alde egingo duen lege bat bultzatu nahi du koordinakundeak. Apirilaren 30a arte dute sinadurak biltzeko. Dagoeneko «milaka batzuk» bildu dituzte. «Oraingoz, oso pozik gaude sinadura bilketarekin», dio Unai Agirrek (Donostia, 1973), koordinakundeko bozeramaileak.

Araban, Bizkaian eta Gipuzkoan hondakinen lege bat izan dadin eskatzeko, sinadurak biltzen hasi zarete. Zer moduz doa bilketa?

Oso ondo. Badakigu apirilaren 30era bitarte lan asko dugula oraindik aurretik, baina oso pozik gaude jendearen aldetik izaten ari garen harrerarekin. Sinatu ez ezik, asko dira gure webgunean sartu direnak: www.errausketarikez.org. Indar handiena Gipuzkoan dugu, baina Bizkaian ere kezka handia dago gai honen inguruan. Ez dugu ahaztu behar Zabalgarbirekin duten arazoa. Eta Nafarroan ere interes handia erakutsi dute gaiaren inguruan. Han ere, puri-purian dago zaborren kudeaketaren inguruko eztabaida. Herritarrak oso kezkatuta daude zaborrak kudeatzeko kontuarekin. Ziur gaude lortuko ditugula gaikako zabor bilketa egiteko legea sustatzeko behar ditugun sinadurak.

Nolako legea proposatzen duzue zuek?

Jakinda zaborraren arazoa zein handia den eta herritar guztiei eragiten digula, ez dugu nolanahiko legea proposatzen. Gure ustez, egungo zaborren bilketa sistemak aspaldi huts egin zuen. Hala, guk errauste plantarik gabeko kudeaketa bat proposatzen dugu, sistema horrek ondorio kaltegarriak dituelako. Atez ateko bilketa bultzatuko duen lege bat sustatu nahi dugu. Gure ustez, sistema horrek oso modu egokian biltzen ditu nahastu gabe dauden gaiak, eta herritarrak birziklatzera behartzen ditu. Laguntza guztiak ematen zaizkio horretarako. Gure proposamena aurrera aterako balitz, zaborraren %70-%80 birziklatuko litzateke. Aldaketa erabatekoa izango litzateke alde horretatik, egun hondakinaren %20-%30 inguru birziklatzen baita.

Herritarren aldetik zein erantzun ari zarete jasotzen zuen lege proposamenaren berri ematen diezuenean?

Jende gehienak garbi du errauste planta ezarri beharrean saioa egin behar dela etxean sortzen diren hondakinak gutxitzeko eta birziklatzeko. Alde horretatik, erabateko babesa jaso dugu herritarren aldetik.

Usurbilen (Gipuzkoa) hemendik gutxira hasiko dute atez ateko bilketa. Zer espero duzue? Hor lortuko diren emaitzak babes hori handitzen lagunduko duela uste duzue?

Oso itxaropentsu gaude horrekin. Ziur gaude lortuko diren emaitzak oso onak izango direla, bai bilketa kopuruan, bai eta kalitatean ere. Hori bultzada handia izango da guk babesten dugun hondakinen kudeaketa motarentzat.

Eusko Legebiltzarrak izango du, halere, zuen proposamenari buruzko azken hitza. Hitz egin al duzue alderdiekin? Zein iritzi jaso dituzue haien aldetik?

Egia esan, oraindik ez dugu landu alderdiekiko harremana. Dena den, Legebiltzarrean herri ekimen legegilea erregistratu genuenean, jarrera ona ikusi genien Ezker Batuari, Aralarri eta ezker abertzaleari. PSE-EEk eta PPk, berriz, aztertuko zutela esan ziguten. Eztabaidatzen denean ikusiko dugu, halere, alderdiek benetan zein jarrera duten.

Jarrera horiek ikusita, proposamena aurrera aterako dela uste duzue?

Lehenbizi, 30.000 sinadurak lortu behar ditugu, eta ez dugu zalantzarik lortuko ditugula. Hortik aurrera, ezinbestekoa iruditzen zaigu herritarrok garbi uztea zaborren kudeaketak asko kezkatzen gaituela eta ez dugula errauste plantarik nahi. Gure aldetik, herriz herri hitzaldiak ematen ari gara, erraustekoak ekologia aldetik, sozialki, ekonomia aldetik eta osasunaren ikuspegitik ekartzen dituen kalteez ohartarazteko. Gainera, kalean mobilizazioak antolatzen jarraitzeko asmoa ere badugu.

Eusko Jaurlaritzarako hauteskunde kanpaina bete-betean dago. Alderdien aldetik ikusi al duzue proposamenik hondakinen kudeaketaren inguruan?

Egia esan, badirudi gaia ez dela oso atsegina eta eztabaida politikotik kanpo dagoela. Inork ez du ezer esan gai honen inguruan, eta kezkagarria iruditzen zaigu. Herritarrok dugun arazoa da.

Zubietan kokatu nahi dute errauste planta, baita kartzela ere. Hango herritarrak horren aurka ari zarete borrokan. Nola doaz gauzak alde horretatik?

Herri txikia da Zubieta, eta indar gutxi daukagu. Baina gauzak egiteko borondatea handia dute herritarrek. Zorte txarra izan dugu, Donostiaren zati izanik han nahi ez dituzten azpiegitura guztiak gurean jarri nahi dituztelako. Baina ez dugu etsiko aurrera daramagun borrokan. Errauste plantaren kasuan, kokapenaz gain, sistema bera salatzen dugu. Izan ere, gure ustez, oso sistema garestia, kutsagarria eta kaltegarria da errauste plantarena.