Atez Ate herri gehiagotara: Orioko udala Usurbilekin bildu da, Zumaiako EAko alkatea gero…

Atalak: Atez atekoa, Gaikako bilketa

Usurbilen gauzatu zenetik Atez Ateko sistema interesa pizten ari da inguruko herrietan. Orioko udalak udazkenean hartutako erabakiaren ondoren, orain bertako goi karguak bildu dira Usurbilgoekin A-Akoaren zertzeladak ezagutzeko. Egunotan Zumaiako alkate Iñaki Agirrezabala ere (EA) izana da bertan Jesus Mari Larrazabalekin batera. Urola-Kostako Hitzak eman du mugimendu horien berri.

Orion, atez ateko bilketa aztertuz (Hitza)

Usurbilgo hondakin bilketa prozesua eredutzat hartuta, Orion sistema bera jarraitzeko proposamena egin dute udalbatzarrean

amaia ventas

Orion, Usurbilen egiten duten moduan, atez ateko hondakin bilketa egitea planteatu dute. Aurreko asteko udalbatzarrean udalerrian sortutako hondakinak ez erretzeko eskaria egin zuten. Mozioaren alde bozkatu zuten alderdi guztiek, EAJk izan ezik. Orioko Ingurumen zinegotzi eta ezker abertzaleko alderdikide Leire Zinkunegik jakinarazi duenez, beren asmoa atez ateko sistemaren aldeko gehiengoa lortzea da, Orion, eta Gipuzkoa osoan orokorrean, errauste plantarik martxan jar ez dezaten. Hori dela-eta, Usurbilgo sistemaren nondik norakoak ezagutze aldera, San Markoseko Mankomunitateko lehendakariorde Imanol Azpirozekin bildu ziren Zinkunegi, Obra eta Zerbitzuetako zinegotzi Jesus Rodriguez, Udaleko idazkari Jon Carrera eta Udaltzaingo buru eta hondakinen zainketaren arduradun Joxe Carrera, herenegun.

Bertan, Azpirozek bilketa ereduaren abantailak nabarmendu zituen: «Sistema honi esker, kalitate hobeagoko konposta sortzen dugu, eta ingurunea eta geure osasuna zaindu, errauskailuen lana gutxitzen duen heinean». Honekin batera, kaleetan edukiontziak pilatzea ekidin dute. Hala, duela urtebete ingurutik (iazko martxoan hasi ziren atez ateko bilketarekin), beira biltzeko igluak edo edukiontziak soilik ageri dira kaleetan. Herritarrek hondakinak beren etxebizitzen, denden edota tabernen atarian kokatu dituzten esekilekuetan uzten dituzte, zabor mota bereizita eta egun jakinetan.

Bost zabor mota bereizita

Hala, bost zatitan banatu behar dute zaborra bizilagunek: Udalak emandako edukiontzi marroian hondakin organikoak; plastikozko poltsetan ontzi arinak; berziklatzen ez den zaborra eta hondakin organikoa ez dena; papera eta kartoiak sokaz bilduta, paperezko poltsetan edota kartoizko kaxetan; eta azkenik, beira, ohi bezala, dagokion ontzira botatzen dute.

Bestalde, ordutegia errespetatu ezin dutenentzat larrialdietako guneak ezarri dituzte, orduz kanpo hondakinak kanpora ditzaten. «Ohitura aldaketak egitea da, azken finean. Behin ohituz gero, era egokian funtzionatzen du sistemak» azaldu zuten. «Lehenengo egunetan prozesua ongi barneratzea da garrantzitsua», Azpirozen ustez. Arazoren bat izanez gero, informazio gunea antolatu du Usurbilgo Udalak, «arauak betetzen ez dutenen parte emateko edota zalantzak argitzeko». San Markoseko Mankomunitateko lehendakariordeak prozesuaren kudeaketa osoa Udalak egin duela adierazi du: «Ezinbestekoa da sistema soka motzean kontrolatzea, emaitza ona jaso nahi badugu behintzat». Era berean, Orion sistemak ongi funtzionatuko lukeela nabarmendu du, udalerria bildua izanda, atez ateko bilketa erraz egin daitekeelako. «Sei hilabetean martxan jarri daiteke atez ateko bilketa, eta edozein Udalek egin diezaioke gastuei aurre», esan du.

sistemak interesa piztu du inguruko herrietan
Joan den astean, Zumaiako EAko alkate Iñaki Agirrezabalaga Usurbilen izan zen, bertako atez ateko bilketa ezagutzeko asmoz, Gasteizko legebiltzarreko EAko parlamentari Jesus Mari Larrazabalekin batera. Era berean, beste hainbat eragilek ezagutu du prozesua: LAB sindikatuko kideek, eta Orioko Aralarreko eta ezker abertzaleko hainbat alderdikidek, besteak beste. Datozen egunetan Realeko jokalariek eta Greenpeaceko kide Juantxo Perezek hondakinen kudeaketa sistema ezagutuko dute.