Zer da hau?

Atalak: Aurkezpenak

Zero Waste edo Zero Zabor mugimenduaren logoa

Hondakinen inguruan Euskal Herrian eta munduan sortzen diren informazio, dokumentu eta iritzien agertoki izan nahi du Zero Zabor kanalak.

Luzaz gizarte industrializatuek begien aurretik urrutiratu eta ezkutatuak, XX. mende bukaeratik gai nagusien artean daude gaur. Hondakinetan azaleratzen dira XXI. mendean Lurra planetan bizi garen jendeon arazo eta erronka nagusiak: garapenak bere kutsadurekin eragindako kalteak (gizakien osasunetik klimaren aldaketara), munduko aberastasunen eta kutsaduren banaketa injustoak dakartzan era guztietako gatazkak, naturako baliabideen xahuketa kontsumismoan oinarritutako produkzio sistemak ekarria… Hitz bitan, 1972an Erromako Klubak “Hazkundearen mugak” izendatu zuen egia dagoenekoz mamitzen ari da denon begien aurrean.

Kanal honetan bilduko ditugu ARGIAk berak sortutakoez gain inguruko hedabideek hondakinez plazaratzen dituzten albiste, irudi, bideo eta gainerako agiriak, eta baita gaia sakonagotik ezagutu gura duen herritarrak eskertuko dituen mota guztietako erreferentziak ere.

Gipuzkoan hasita Euskal Herri osora hedatzen ari den gatazkatik askoz haratago doa hondakinen gaia. Kontsigna edo ametsa baino askoz gehiago den moduan Zero Zabor estrategia. Gizakiok beste ezer baino gehiago hondakinak sortzen ditugu, kontsumitzen dugun ale bakoitzeko 9 ale hondakin. Beraz, hondakinak denon ardura direnez, hedabide arduratsu izaten ahalegintzen den ARGIAk bere gain hartzen du dagokiona.

Zero Zabor kanal hau 2012an abiatu da, euskara hutsez, ARGIAk historian zehar landu duen moduan. Data horren aurretiko albisteak Zubieta SOS blogean azalduak dira eta sarritan gaztelaniaz daude; aurreko bost urteetan prentsak gaiari eskainitako berrien bildumak dokumentutzat garrantzia duelakoan jaso ditugu.