Martxoaren 20an, ‘flash-mob’ erraldoia egingo da Zubietan errausketa plantaren aurka

Atalak: Atez atekoa, Gaikako bilketa

Gipuzkoa Zero Zabor mugimendua martxoaren 20rako flash mob erraldoia prestatzen ari da, errauste planta egiteko asmoak salatzeko, helburutzat hartu duelarik 2.000 pertsona biltzea horretarako prestatutako kanta-koreografien inguruan dantzan.
Lady Gagaren abesti ezagun bat hartu eta euskarazko hitza jarri diote. “Hartu nahi dut arnas” izenburupean, elkartasun uholdea sortu nahi dute Zubietan. Mikel Erguin koreografoa arduratu da musikarekin bat doan dantzaren pausoak asmatzeaz. Abestia eta koreografia uztarturik, flash mobarekin erantzun alai eta irudimentsua eman nahi zaio Gipuzkoako indar faktiko supiztaileek (diputazioak, alderdi handietako buruzagiek, Gipuzkoako egunkari salduenak…) hondakinak erretzetik aberasten diren enpresa handiekin elkar hartuta jarri nahi duten asmo kixkaltzaileari.

Urtarrilaren 29an hasi zirenetik, asteak daramatzate entsaiatzen, Beasainen, Zarautzen, Zumaian, Oñatik, Zubietan, Orion, Hernanin, Donostian, Andoainen, Usurbilen, Lasarten, eta abar.

Prentsa pixkanaka hasi da gertakizun honi buruzkoak azaltzen:  “Dantza, hobeto arnasteko” (Berria), “Mikel Erguin: «Musika ipini orduko dantzarien artean magia sortzen da, zoragarria da»” (Hitza), “«Las formas para reivindicar cosas están calculadas» Erik González y el ‘flash mob’, el baile por una Gipuzkoa sin basura” (Diario Vasco).

Zubietako flash mobean dantzatuko denaren aurrerapen bat ikus daiteke honako bideootan: Zarautzko 1 entsaioa eta 2 entsaioa,   Getariako baporean egindakoa, Donostiakoa eta Zumaiakoa. Eta inork ez entsaiatzeko aitzakiarik eduki ez dezan, etxean ere norberak preparatu dezake koreografia tutorial hauek ikusiz.