‘Plastikozko ozeanoak’ dokumentalak produktu honekin eragiten ari garen arazoaren tamaina erakusten digu

Atalak: Berrerabilpena, Bideoak, Dokumentalak

Ozeanoak munduaren zabor ontzi bihurtzen ari dira. Kilometro koadro bakoitzak 74.000 plastiko pieza ditu bataz beste. Hondakin hauek ehundaka mila animalia hiltzen dituzten urtero. Horrez gain, produktu kimikoak pixkana elikagai katean sartzen dira, arrain txikiek plastiko zati txikiak jaten dituztelako, eta arrain handiagoek hauek, eta ondoren, guk arrain hauek jaten ditugulako. Zer eragingo du epe luzean plastikoaren kutsadura honek? Zer egin dezakegu ozeanoak garbitzeko? Galdera hauek planteatzen ditu Océans de Plastique dokumentalak. Hemen ikus dezakezue bertsio originalean frantsesez, eta TVE2-eren webgunean gazteleraz. Plastikozko ozeanoak litzateke izenburua euskaratuta.

Bertan azaltzen da plastikoa era masibo batean erabiltzen duen hirugarren belaunaldia garela, eta 60 urtean, plastikoak itsasoa kolonizatu duela. Herbehereetan, material hau topatu dute ikerlariek aztertu duten hegaztien %95aren urdailean; Alemanian, plastikotik datozen produktu kimikoak topatu dituzte animalien ugalketa organoetan, eta Californian, gora doaz tripak plastiko zatiz beteta hiltzen diren balea eta izurdeen kopurua.

“Itsasoaren gainazala, ur azpian metro batzuk eta mila metroko sakonera ere kolonizatzen utzi diogu plastikoari. Material hori bertan egongo da mendeetan zehar, batez ere sakonera handian badago, oxigeno gutxi eta argirik ez baitago han, plastikoa deskonposatzea eragiten duten bi faktoreak. Gauzak horrela, bertan geratuko da hori ehundaka urtez”, diote dokumentalean.

Bertan, soluzio gisa, erabilera murriztea eta sortutakoaren birziklajea proposatzen dituzte, eta une batean hondakinak atez ate biltzen dituzten sistema bat erakusten dute, baita konpostajea egiten duten familiak ere.

Lana Sandrine Feydelek zuzendu du eta 2009an argitaratu zuten. Nazioartean sona handia izan du.