Olatzagutiako alkate ohia (NaBai) gose greban Portland aurrean

Atalak: Errausketa, Nafarroa, Porlan fabriketan

Noticias de Navarrak azaldu duenez, gose grebari ekin dio Olatzagutiako alkate (Nafarroa Bai koalizioaren barnean) eta Cementos Portlandeko sindikalista historikoa izan den Epi Marinek, enpresak lanpostu txarrago batera zigortu duelakoan.

Babes bakartzat daukan furgonetaren ondoan, porlan fabrikarako sarbidea den zubian dago gose huelga egiten Epi Marin Cementos Portlandeko langilea eta Olatzagutiako alkate ohia. 43 urtez usina horretan aritu ondoren, Enplegu Erregulazio Espedientea (ERE gaztelaniazko sigletan) ezarria daukan Portlandek, lehengo lanbidetik atera eta aste beteko oporren bueltan garbiketan jarri du Marin. Bere ustez kategoriaz jaisteaz gain humiliatzeko hartutako erabaki horren kontra ekin dio baraualdiari ELAko sindikalistak.

ELA sindikatuko Juan Larraiak Noticias de Navarrari esan dio Epifanio Marin gizon garrantzitsua izan dela Portlandeko borroketan eta enpresak EREa darabilela azken urteotan zuzendaritzaren kontra nabarmendu diren beharginak zigortzeko. “Enpresak azpikontraten lanetara bidali ditu lau langile, kategoriarik apalenekoetara, hirugarren mailara. Lauotatik hiru ELAkoak dira eta bestea LABekoa”.

Epi Marin Olatzagutiako alkate izan zen hilabete batzuetan 2009an, dimitutu zuen Iñaki Mentxakaren ordez. Nafarroa Baik zeukan gehiengoa orduan baina giro oso gaiztotua bizi zen herrian, funtsean NaBaikoen eta ezker abertzalekoen artean, besteren artean tartean zegoelarik porlan fabrikan Nafarroako hiri hondakinak kiskaltzeko asmoaren inguruko polemika. 2009ko azaroan Marinek Noticias de Navarran garbi defenditu zuen enpresaren asmoa, bere ustean “hondakinen errausketa ez baina balorizazioa” zelakoan.

Hala ere, Marin alkate zela Olatzagutiako udalak aho batez onartu zuen porlan fabrikarekiko protokolo bat, zeinak bermatu nahi zuen han sutuko ziren erregaien kontrola, puntu zehatz hau barne: “El Ayuntamiento se posiciona clara y tajantemente en contra de la valorización energética (incineración) que Cementos Portland Valderrivas quiere llevar a cabo en su planta de Olazti“. Enpresak berehala eskatu zuen jarraipen batzordea biltzea eta bileraren biharamonean utzi zuen alkatetza Marinek.

Geroztik, munduko krisiaren erdian Espainiako hormigoiaren burbuila lehertuta, porlan salmentak arras apaldu dira denetan. Cementos Portlandek lortu du Nafarroako hiri hondakinak erretzeko baimena eta aldi berean langileentzako EREa ezarri, Olatzagutian bertan 28 behargin kanporatu eta beste batzuk kategoriaz apalduz.

Noticias de Gipuzkoa “Un trabajador de Cementos Portland inicia una huelga de hambre en Olazti“, “No se trata de incineración de residuos, sino de su valorización” eta “Epi Marín presenta su dimisión como alcalde de Olazagutía dos meses después de acceder al cargo“.

EITB “Un trabajador de Cementos Portland, en huelga de hambre”