‘Atez Ate 3.0’ Astigarragan eta Goierrin

Atalak: Atez atekoa, Aurkezpenak, Mankomunitateak, Udalak

2013an Gipuzkoan hondakinak atez ate biltzen hasiko diren herrietan sistemak berrikuntzak ekarriko ditu orain arte Usurbilen, Hernanin, Oiartzunen eta Antzuolan dauzkaten ezaugarriekiko. Honetan ere anitza izango da Gipuzkoa. Ikus dezagun nola.

Atez ateko sistemak baditu baldintza batzuk denetan berdinak: herritar guztientzako derrigorrezkoa da, hondakinen atal guztiak bereizten ditu, familia bakoitzaren hondakinak modu pertsonalizatuan jasotzen dira eta %80tik gorako birziklapen tasak lortu nahi ditu. Printzipio horiek zehazterakoan, Usurbildik hasita Gipuzkoan orain arte martxan dagoen ereduak antzera soluzionatzen ditu hainbat xehetasun, berriro hemen esplikatzea ez luketenak merezi. Herriok Katalunia eta Baleareetako esperientzietan oinarriturik (hango Porta a Portari deitu diezaiogun Atez Ate 1.0) berrikuntza batzuk sartu zituzten, hala nola organikoa kuboan plastikorik gabe lagatzea (gero konsposteratzea erreztu eta merketzeko) eta hondakinentzako zintzilikario edo poste famatuak, atzerritar askok sekulako aurrerapentzat jo dituztenak eta hemen aldiz sistemaren kontrakoek beren gorrotoen ikur bihurtu dituztenak. Gipuzkoako lau udal aitzindariek Atez Ate 2.0. darabilte.

2013an atez atekoan sartuko diren herriek berrikuntza gehiago dakartzate. Ez denak denetan, ez denetan berdinak. Laster abiatuko diren herrien artean, sistemaren xehetasunak eztabaidatu eta erabakitzeko prozesuak bukaturik, egunotan aurkeztu dituzte Astigarragan (San Marko mankomunitatekoa), Itsasondon, Legorretan eta Zaldibian (Sasietakoak) izango dituzten ezaugarriak. Hona Atez Ate 3.0 honen berrikuntza batzuk:

– Kuboak erabiliko dituzte frakzio guztientzako. Organikoaz gain, papera kubo urdin batean eta ontzi arinak hori batean aterako dituzte. Lau kubo etxe banatan, guztiak txip elektronikoz pertsonalizatuak.

– Paperaren kasuan, familia ugariko portaletan onartuko da denena ontzi handi bakarrean ateratzea.

– Poste edo zintzilikario famatuak ez dira denetan jarriko. Auzotarrekiko bileretan erabakiko dute eguneroko kubook lurrean utzi (erreza pisu gutxiko eraikinetan, konplikatuagoa bloke handietan) edo non kokatu posteak.

– Organikoa kubo barruan zorro biodegradagarri batean utzi ahal izango da. Gainera, organikoa dela eta bosgarren kubo bat ere edukiko da etxeetan: 7 litroko txikia etxean edukitzeko, 20 handia kalera ateratzeko.

Zenbait kazetarik erakutsitako pozak balio balu termometrotzat (“Desde el punto de vista de la comodidad de la ciudadanía, el modelo planteado para Astigarraga cuenta con algunas ventajas con respecto a Hernani” idatzi du Astigarragako kronistak Diario Vascon, “La empresa Spora propone también para Legazpi un ‘puerta a puerta’ sin postes” titulatu du Noticias de Gipuzkoak) igoal pentsatuko genuke atez atekoaren kontrako jarrerak gozatu beharko luketela aldaketekin.

Gipuzkoan hondakinen kudeaketa berritu beharrari buruzko eztabaitan atzeratuta datozen herriek gero eta formulen mix anitzagoa daukate aukeran %80ko emaitzak lortzeko: aipatu Atez Ate 2.0 eta Atez Ate 3.0z gain Sakanakoak bere berezitasunak ekarriko ditu (Atez Ate 4.0?), Gipuzkoako herri txikietan zabaltzen ari da Orendain formula deitu dezakeguna… 2013 osoa baitaukate aztertu eta eztabaitzeko, seguru bateko eta besteko osagairik egokienak hautaturik Donostiako herritarrek (eta Eibarkoek, eta Irungoek, eta Lasartekoek eta…) aurkituko dutela 2014an abiatzeko sistema beren neurrietara egokitua.

Diario Vasco “Las claves del PaP en Astigarraga”

Noticias de Gipuzkoa “La empresa Spora propone también para Legazpi un ‘puerta a puerta’ sin postes”

Sasieta mankomunitatea “Bilketa sistema diseinatuta“