Bilbok orain arteko bidea aldatu eta hondakinak erraustu egingo ditu

Atalak: Bizkaia, Udalak

Bilboko hiri hondakinak azken urteotan ez ziren joaten Zabalgarbiko errauste plantara, Iñaki Azkuna jeltzaleak Ezker Batuarekin zeukan gobernu itunak baldintzetako bat hori zuelako. Egunotan jakin da, Bizkaiko TMB berriaren inaugurazioaren informazioaren barruan, Bilboko hondakinak Zabalgarbik kiskaliko dituela aurrerantzean.

Berrian Maite Asensio Lozanok sinatutako “TMB plantara helduko den zaborraren %80 erraustuko dute” informazioaren barruan, hona pasartea: “Bizkai osoko zaborra jasoko du TMB plantak, Bilbokoa barne. Izan ere, hiriburuko hondakinak ez dira egun Zabalgarbira eramaten, zuzenean zabortegira baizik, EB udal taldean zegoen garaian ez zutelako neurria onartu. Aurrerantzean, ordea, Bilbon urtero sortzen diren 100.000 tona inguru zabor helduko dira tratamendu mekaniko-biologikorako plantara eta, bertan tratatu ostean, errauste plantara bideratuko dute parte bat.”