Europako Legebiltzarrean Gipuzkoako eredu berria aurkeztu dute

Atalak: Aldundiak, Europa, Gaikako bilketa, Plangintza, Prebentzioa, Udalak

Gipuzkoako ingurumen diputatu Iñaki Errazkinek Europako Legebiltzarrean aurkeztu ditu lurralde horretan hondakinen kudeaketan lortzen ari diren emaitzak, Zero Waste Europek Berdeen taldearekin elkarlanean antolatutako Toward Zero Waste jardunaldian. Bilkuran konbidatuen artean izarra Janez Potocnik Europako Ingurumen komisario izan da, zeinak Gipuzkoako esperientzia ‘adierazgarria’ eta ‘garrantzitsua’ dela esan baitu, eta gainerako herrialdeei ‘ikasteko’ balio diezaiekeela.

Bigarren titulutzat ‘Beyond recycling: Best practices on resource management in the EU’ (Birziklapenetik haratago: baliabideen kudeaketan Europar Batasunean dauden praktika onenak) daraman ekitaldian Europako bi esperientzia aitzindari nabarmendu eta azaldu dira. Bata da Italiako Rifiuti Zero (Zero Zabor) mugimendu zabalaren bihotza den Capannori herria; bertako auzapez Giorgio del Ghingaro aritu da azalpenak ematen.

Gipuzkoatik Iñaki Errazkin diputatuaz gain bi alkate bertaratu dira: Atez Ateko bilketa ezartzen bigarren herria eta orain artekoetan handiena den Hernaniko Luis Intxauspe eta Zero Zabor bidetik abiatu diren herri txikietan lehena den Orendaingo Gorka Egia. Hauekin izan da Gipuzkoako Hondakinen Konsortzioko presidente Juan Karlos Alduntzin ere. Errazkinen mintzaldia bideoz ikusgai dago.

Herri mugimenduen koordinadora izateaz gain Europako instituzioetan presentzia handia duen Zero Waste Europek Gipuzkoa Italiako Capannori eta Rifiuti Zero mugimenduaren parean aurkeztu izanak erakusten du euskal lurralde horrek hondakinen kudeaketaren arloan hartu duen garrantzia. Gipuzkoaren protagonismo hori duela urte bete Zero Wastek Donostian egindako biltzarrean aldarrikatu zuen mugimenduaren mundu mailako liderra den Paul Connet iparramerikarrak.

Janez Potocnik komisarioak esan dituenak zehazki ezagutu nahi dituenak kronika bat baino gehiago leitu beharko ditu paperezko izparringietan. Hedabide gehienek azpimarratu dituzte Potocnikek Zero Zabor ereduari eskainitako loreak; aldiz, Noticias de Gipuzkoak “Bruselas apoya la incineración de los residuos no reciclables o reutilizables” titulatu du bere kronika. Pentsatzekoa da hari horrek polemika gehiago ekarriko duela ondoko egunetan. Batzuek eta besteek Potocnikek idatzi dituztenetatik ondorioztatu daiteke komisarioa ez dagoela berez errausketaren kontra eta aldi berean Zero Zabor eredua ikusten duela epe ertaineko aurrerabide bezala, edozein gisan Europak hondakinentzako ezarritako hierarkia zorrotz errespetatzea esijitzen duela eta bide batez ohartarazten duela azpiegitura handiegietan dirua inbertitzearen arriskuez.

Bilkurak Gipuzkoatik joandako ordezkaritzari ekarri emaitza zehatzen atalean, Eskualdeen Komiteak eta Europako Batzordeak hondakinen inguruko ikerketa bat egiteko eskatu dio Ecologic Institute erakundeari, Austriako Ingurumen Ministerio Federalaren eta Vienako Unibertsitatearen laguntzarekin egin dezan. Ikerlan horretan modu berezian aztertuko dute Debagoienako mankomunitatean Atez Atekoa lehenbizikoz ezarri duen Antzuolaren kasua, orain artekoen artean emaitzarik onenak erdietsi dituelako.

Iturriak:

Berria “Gipuzkoako eredua goraipatu du Ingurumen komisarioak”
Gara “Europa considera «aleccionadora» la gestión de residuos en Gipuzkoa”
Diario Vasco “Europa cree que la gestión de residuos en Gipuzkoa es ‘aleccionadora’”
Noticias de Gipuzkoa “Bruselas apoya la incineración de los residuos no reciclables o reutilizables”
El Pais “La UE considera “aleccionadora” la gestión de residuos en Gipuzkoa”
Gipuzkoako Foru Aldundia “Hondakinak kudeatzeko Gipuzkoako Foru Aldundiaren eredua goraipatu du Europak“ eta “Europa elogia el modelo de gestión de residuos de la Diputación Foral de Gipuzkoa“. Errazkin diputatuaren mintzaldia bideoz: “Hondakinak kudeatzeko Gipuzkoako Foru Aldundiaren estrategia, eredugarri Europan”
Zero Waste Europe Twitterren