Donostiak urtean 4,5 milioi aurreztuko lituzke Atez Atekoaz, Gipuzkoak 17,5

Atalak: Atez atekoa, Ekonomia, Udalak

Donostiak urtean 4,5 milioi euro aurreztuko lituzke atez ateko hondakin sistemarekin.

Usurbilgo udalak plazaratu berria duen Hondakinen bilketa Usurbilen: eragin ekonomikoa (2008-2012) azterlanean kalkulatu duenez, herri horretan azken lau urteotan funtzionatu duen hondakinen Atez Ateko bilketa sistema Gipuzkoa osora zabalduko balitz 17,5 milioi arte hobetu liteke hondakinen kudeaketaren balantze ekonomikoa. Usurbilen kudeaketak erakutsi dituen emaitzak aztertzen ditu nagusiki 12 orriko txostenak, baina azken atalean Gipuzkoako beste zenbait herritara eta lurralde osora emaitzok estrapolatzeko ahalegina egin du.Herritarra sarritan ez baitu hainbeste kezkatzen udalak zerbitzu batekin lortutako defizit handigoa edo txikiagoak, norberak pagatzen duen tasak baino, Usurbilgo udalak alderatu ditu bere hondakin tasak eta inguruko herrietakoak, ondorioztatzeko Gipuzkoako apalenetakoak daudela Usurbilen: 80,28 eurokoa da tasa orokorra eta organikoa familiaka nahiz taldeka konpostatzen dutenek hobariekin 48,16 pagatzen dute. Esaterako, Larraulen 184 euro pagatzen dute, Aian 164,8, Donostian 123 eta Azpeitian 111.

Dio txostenak azken orrian: “Usurbilen atez ate sistema erabiliz lortutako emaitzak, hau da, bereizketa tasa %80tik gora jartzea, beste herrietan ere lortuko balitz, eragin ekonomikoa ere antzekoa litzatekela suposa dezakegu. Horren estimazioa egin dugu zenbait herrientzako eta Gipuzkoa osorako, Usurbilen 2012 urtean lortutako etekin ekonomikoa erreferentzia gisa hartuta”.

Hor eskaintzen dituzte tituluan eman ditugun datuak, beste herri batzuetarako egindako estrapolazioarekin batera. Alegia, Donostia bat  urtean 4,5 milioi aurreztera iritsiko litzatekeela hiri osoan hondakinak biltzeko Atez Ateko sistema ezarriko balu eta Gipuzkoak eredu hau lurralde osora zabalduz gero 17,5 milioi arte gutxiago gastatuko lukeela hondakinen kudeaketan. Ikerlanak garbi ohartarazten du kalkuluak Usurbilgo biztanle kopurua hiri eta herri horietakoekin alderatuz eginak daudela, eta emaitzak mamitzerakoan faktore askok hartzen dutela parte, baina joera nagusia ez luke horrek aldatuko. Alegia, kontutan hartuz batetik bilketak berak dauzkan koste handiagoak eta bestetik bildutakoaren tratamenduan kosteak asko murrizten direla, Atez Atekoarekin herri eta hiriok denek dirua irabaziko luketela.

‘Hondakinen bilketa Usurbilen: eragin ekonomikoa (2008-2012)’ txostenaren lehen orria

Usurbilen Atez Atekoak eskaini dituen emaitza ekonomikoak honela laburbildu ditu udalak:

– Atez Ateko bilketak handitu egin ditu diru-sarrerak eta kostuak. Balantzea positiboa da: gehiago handitzen dira diru-sarrerak kostuak baino.

– Soilik 2012 urtean eragindako etekin ekonomikoa 149.535 €-koa da, ohiko lau edukiontzien sistemarekin alderatuta.

– Hondakin kudeaketak eragindako defizita etengabe jaitsi egin da Atez Ateko sistema ezarri zenetik (2008an, %60, 2012an, %20), nahiz eta usurbildarrek Gipuzkoako hondakin-tasarik
txikienetako bat ordaindu.

– Atez Ateko bilketak ahalbidetzen duen autokopostatzeagatik hobari indibidualizatuak suposatu du herritarrek 17.852 € gutxiago ordaintzea beren hondakin-tasetan 2012 urtean.

– 5. edukiontziaren sistema da, ekonomikoki, okerrena: ez du diru-sarrerarik handitzen, eta kostuak aldiz dezente igotzen ditu.

Usurbilgo udalaren azterlanak garbi ohartarazten du Usurbilgo emaitzak Gipuzkoako beste herrietara zabaltzeko kalkuluak biztanleen proportzioan egin dituela: “Usurbilen atez ate sistema erabiliz lortutako emaitzak, hau da, bereizketa tasa %80tik gora jartzea, beste herrietan ere lortuko balira, eragin ekonomikoa ere antzekoa litzatekela suposa dezakegu. Horren estimazioa egin dugu zenbait herrientzako eta Gipuzkoa osorako, Usurbilen 2012 urtean lortutako etekin ekonomikoa erreferentzia gisa hartuta (149.535 €)”. Aldi berean, ezin izan bestela, argi utziz honakoa: “Kontuan hartzekoa da emaitzak oso desberdinak izan daitezkeela herri desberdinetan, faktore askok, batez ere populazioaren profil sozialak eta bere ingurumeneko kontzienziazio-mailak, eragiten dutelako lortuko diren bereizketa tasetan eta eragindako balantze ekonomikoan”. Hala eta guztiz ere, begien bistakoa da Gipuzkoa osoari pasatzen diola mezua Usurbilgo herriak: hondakinen Atez Ateko bilketa ingurumenarentzako eta giza osasunarentzako hobea izateaz eta Europak ezarritako hondakinen hierarkia hobeto betetzeaz gain, ekonomiaren ikuspegitik ere onuragarriagoa zaie herritarrei hondakinak edukiontzi bidez gaika borondatez biltzen saiatzen diren sistemak baino.

Xehetasun gehiago nahi izanez gero:

Gipuzkoa Zero Zabor “Donostiak urtean 4.500.000 euro aurreztuko lituzke atez atekoa jarriz gero: Atez ate ekonomia Usurbil 2008-2012 txostena”

Usurbilgo udala “Hondakinen bilketa Usurbilen: eragin ekonomikoa (2008-2012)“