Partzuergoa errauskailuaren eraikitzaileetatik birekin kontratua haustekotan
Berriak eta eta EITBk zabaldu dutenez, Gipuzkoako Hondakinen Partzuergoak laster eten behar ditu Zubietan errauste planta eraikitzen ari diren enpresetako birekin, RESA eta IBH ingeniaritza konpainiekin, dauzkan kontratuak. Mikel Peruarena Ansak zehaztasun handiz kontatu duenez “Errauste plantako lanen bi kontratutan GHK-k legea urratu zuela sumatu dute” kronikan, GHK partzuergoaren gaurko zuendaritzak uste du legalitatea urratuz esleitu zitzaizkiela lanak bi konpainia horiei.
Bi ingeniaritza konpainien artean nabarmenena RESA enpresa katalana da, hondakinen kudeaketa proiektu askoren muinean aritu baita Espainiako estatu osoan, errauste planta asko berak bultzatu dituelarik. Gipuzkoan, hain zuzen, RESAko gizon bat jarri zuten Zubietako asmoaren zuzendaritza teknikoaren arduradun; Armengol Grau iazko maiatzean kaleratu zuen GHKren zuzendaritza berriak. Horregatik kalkulatu daiteke RESA eta IBH ingeniaritzekin kontratuak eteteak esanahi askoz handiagoa daukala biekiko kontratuen dirutzek adierazten dutena baino.
EITBk, bestalde, “Gipuzkoa paraliza contratos para la construcción de la incineradora” albistearen bukaeran datu berri hau gehitu du: “Bitartean, GHK negoziatzen ari da enpresa [talde] eraikitzailearekin elkarrekiko adostasunez gelditzea [Zubietako errauste planta eraikitzeko] kontratua”. FCC, Serbitzu, Altuna y Uria eta AE&E Inovak konpainiek osatzen dute taldea.
Iruzkinik ez
Trackbacks/Pingbacks