Ormazabali bankuak ohartarazi omen zion ez zela egokia 120 milioiko zorra sinatzeko

Atalak: Aldundiak, Bankuak, Ekonomia, Errausketa, Partzuergoa

Gara egunkarian Imanol Inziartek sinatu duen “Ormazabal firmó una operación de 120 millones pese al aviso de La Caixa” kronikaren arabera, 2011ko urtarril-otsailetan Gipuzkoako Foru Aldundian ingurumen diputatua zen Carlos Ormazabalek eta orduan GHK partzuergoaren zuzendari zenak, Joxi Etxezarretak, ez bakarrik sinatu zituzten 120 milioi euroko balioa duten produktu espekulatiboak, gainera ez zituzten kontutan eduki horrelako finantz produktuak erabiltzeko zeukaten ezagutza urriaz  La Caixa bankuak aurretik egindako ohartarazpenak.

Aipatu albistearen arabera, udal hauteskundeetarako hilabete gutxi falta zirela, La Caixak test bana egin zien diputatuari eta zuzendariari, beren finantz ezagutzak neurtzeko. Horren ondotik ohartarazi zioten Carlos Ormazabal jelkideari banku harekin sinatu nahi zuen swap motako  produktua ez zela egokia beretzako, hartzen zituen arriskuak ulertu eta baloratzeko aski ezagutza eta esperientzia ez zeukalako. Gauza bera esan zion idatziz Joxi Etxezarreta zuzendari teknikoari. Bankuak ohartarazten zizkien arriskuen artean aipatzen zuen zehazki milioika euroko galerak nozitu ahal izatea. La Caixaz gain Banestorekin ere sinatu zuten, Garak GHKko iturrietatik jakin duenez, swap motako operazioa. Berehalako galera eragin zioten swap horiek GHKri, sinatzeko unean bertan 5,7 milioi euroko minusbalioa zehazki.

Inziarteren informazioen arabera, egindako testagatik hasieran bankuek Ormazabal sailkatu zuten arren bezero minoristen atalean, ondoren politikoaren eskariz inbertsiogile profesionalen sailean sartu zuten, diputatuak argudiatu zuelako bere gain hartzen zituen konpromisoak baloratzeko aholkulari egokiak bazituela. Bere gain hartzen zuen zorra ez baitzuen pertsonalki kitatu behar, Gipuzkoako Diputazioa uzten zuen haren arduradun.

Kontratu horien beste ezaugarri bat da hitzartutako 120 milioi haien interes eta gainerako obligazioak ez zirela abian jartzen gastatu ahala: aurretik kalkulatutako egutegi bati lotzen zitzaizkion. Beraz, hilero 300.000 euro pagatuko zituen Gipuzkoako Foru Aldundiak aurrikusitako obrak egin ala ez, aipatu dirutza garaiz erabili edo ez, ez aldaketak eta ez berandutzeak kontutan hartu barik.