Udaberrian martxan egongo da Atez Atekoa Sakana eskualdean

Atalak: Atez atekoa, Auto-konpostaketa, Auzolaneko konpostaketa, Mankomunitateak

Udaberrirekin batera hondakinak biltzeko sistema berria jarriko da martxan Sakanan, eskualdeko Guaixe hedabideak zabaldu duenez.  Horrela burutuko da herritarrekin egindako 37 bileraz (2.175 herritarrek hartu omen dute parte) eta inkesta bidez egindako galdeketaz osatutako prozesua.

Hondakin bilketa sistema berriaren  ardatzetako bat da konpostatzea, bakarka edo taldeka egin daitekeena. Mankomunitateak konpostatzea egiteko 1.653 eskaera berri jaso ditu (892 autokonposterako, 761 auzolanean konpostatzeko). Horiei Sakanan aurretik banatutako 300 konpostatzaileak batuta, materia organikoa beste modu batean ia 2.000 familiak aprobetxatuko dutela aurreikusten da eta gainera mankomunitatea eten gabe eskaera berriak jasotzen ari omen da. Apirilean izango dira konpostatzen ikasteko ikastaroak herri guztietan.

Zintzilikariori dagokionez, teknikariak azaldu dio Guaixeri jende askok hura ikusi ondoren, kakoa baztertu eta haren alde egin duela. “Hasieran bazegoen posteen kontrako iritzia, baina, alde batetik, hauek Sakanan eginak direla eta hemengo arkitekturarekin bat datozela ikustean (egurrezkoak izango dira) eta, bestetik, proposatzen diren bilketa puntuetan hurbiltasuna bultzatu denez, jende askok bere hasierako aukera moldatu du”. Dimentsionamendua bukatu ondoren, materialak zehaztutako tokietan jartzen hasiko dira.

Herri txikietan jarriko diren ekarpen-etxolak, jarriko diren auzo-konpostatze gune edo etxolak eta herri handietako larrialdi-guneak ibarreko enpresek garatutakoak dira. Laster Sakanako herritarrek dagozkien materialak jasoko dituzte eta hondakinen bilketa sistema berria abiaraziko du mankomunitateak.