Azpeitiko akordioaz balorazioak
[Pello Zubiria Kamino] Azpeitiko udalean (Bilduk agintzen du gehiengo osoz) hondakinen kudeaketan Bilduk, H1!ek eta EAJk lortu duten akordioaren ondoren lehenbiziko balorazioak irakur daitezke. Azpeitiko EHBilduk bere webgunean dauka osorik “Lortu dugun akordioa urrats handia izateaz gain, urrats atzeraezina da” agiria. Berria egunkariak plazaratu “Hondakinei buruz lortu duten akordioa ‘pauso handia’ da, Azpeitiko EH Bilduren ustez” kronikan zenbait iritzi bildu ditu Ainara Arratibel Gasconek. Horrela, “‘denok irabazten aterako garen konpromiso baten aurrean gaude, eta adostasun politikotik sozialera salto eginda, herri eredugarri bat izatea lortuko dugu’, adierazi zuen atzo Eneko Etxeberria alkateak. Ziur da gauzak ondo eginez %70eko birziklatze tasa lortuko dutela (…) Etxeberriak aitortu du ‘inbidiaz’ begiratzen dietela atez ateko sistema duten herrietan lortu diren emaitza ‘ikusgarriei’ (…) ‘Datuek esango digute [dio alkateak] martxan jarritako politika berriak norabide egokian doazen edo ez. Emaitzek epaituko gaituzte. Baina hondakinen alorrean, herri honek beste norabide bat hartu du konpromiso honekin'”.
Hamaikabatek Uztarrian plazaratutako “Akordioa vs inposizioa” girian, akordioari ongi etorria emateaz gain dio: “Zaborren arazoak loturik daraman dramatismoa eta tentsioa ezabatzeko gai izan behar dugu” eta aurreraxeago “Hondakinak arazo politiko eta sozial bihurtzea ikaragarrizko arduragabekeria da. Herritarrek, arazoak konpontzea exijitzen digute eta ez sortzea, Bilduk Gipuzkoan hondakinekin egin duen bezala”. H1!k nabarmen baloratu du Azpeitiko akordioa Gipuzkoako beste herri batzuetan Bilduk ezarri dituen estrategiekin kontrajarrita dagoela. Bestalde, dio alderdi honek: “Ez gaitezen deskuidatu, gaurko Azpeitiko arazorik larrienak gure enpresa sarearen egoera, langabezia eta gero eta familia gehiagok pairatzen duten egorea zailak dira.”
Kritikoago azaldu da Azpeitiako Zero Zabor taldea Uztarrian argitaratutako “Udalbatzak onartutako mozioaren balorazioa” idatzian. Garbi azaldu ondoren “positiboki baloratzen dugu Azpeitian aho batez gutxienez %70eko bilketa selektiboa lortu behar dela adostu izana”, kritika garbiak egiten dizkiote udaleko hiru taldeek onartutakoari. Batetik, “ez zaigu zentzuzkoa eta teknikoki profesionala iruditzen bilketa-sistema onena erabakitzen hasi aurretik, sistemetako bat jokoz kanpo uztea. Atez ateko bilketa-sistema, hain zuzen ere”. Bigarrenik, “ez zaigu zentzuzkoa iruditzen teknikoki azterketarik egin gabe edukiontzien sistemara bakarrik bideratzea eztabaida. Teknologia berriak, ‘chip’-ak, kontrol digitala, etab. bezalako sistema esperimentalen bidea jorratzea erabaki da. Pixkat aztertzen hastea nahikoa da konturatzeko horrelako sistemak direla garestienak eta mozioa aurkezterakoan alderdi guztiek aipatu zuten gaur egun dugun egoera ekonomiko larria”. Azkenik, udal gobernu taldeari edo zehazki alkateari egindako kritika: “hemendik aurrera sortuko diren eztabaidak eta erabakiak orain arte izan direnak baino transparentzia handiagoarekin gauzatzea gustatuko litzaiguke”.
Iruzkinik ez
Trackbacks/Pingbacks