Bidasoaldeko 5. edukiontzian ez da onartzen ez haragirik, ez arrainik
Hitzak zabaldu du “Landare hondakinak gaika biltzeko 15.000 familiak eman dute izena Bidasoan” albistea, Diario Vascok “El 47% de los hogares bidasotarras se apuntan al quinto contenedor” titulatu duena. Bietan ageri da informazio harrigarri hau: hondakin organikoentzako bostgarren edukiontzian Bidasoaldeko herritarrek ez dituzte utziko landareen hondarrak baizik. Txingudi mankomunitatearen bideo honek ere garbi adierazten du zer ez den laga behar organikoentzako 5. edukiontzi marroian: ez arrainik, ez haragi kozinaturik, ez paperik, ez kartoi garbirik.
Hondakin organikoen eztabaida hori -“Txerri-janaren gudua” ere deitua- aspaldi gainditurik, Gipuzkoako gainerako eskualdeetan bai Atez Ate biltzen den lekuetan eta bai 5. edukiontzi borondatezkoan, hondakin organikoetan uzten dira kozinatutako jakien hondarrak ere. Txingudik egiten duen hautua kontraesanean dator Europa osoan organikoa gainerako hondakinetatik bereizteko erabiltzen diren estrategiekin.
Bi hilabete baino gehiago dira izena eman genuela Hondarribian 5. edukiontzia erabiltzeko; ordurako kalean jarri zituzten edukiontzi berriak, eta epe honetan ez dira gai izan giltzak eta ontzi marroiak etxeetara banatzeko; gurera behintzat ez dira iritsi.