“Errauskailuaren ondorengo eszenatokian” adostasuna nahi du Gipuzkoako Aldundiak

Atalak: Aldundiak, Atez atekoa, Iritziak / Adierazpenak, Konpostaketa, Politikariak

Iñaki Errazkin Gipuzkoako Ingurumen eta Lurralde Antolaketarako diputatuak dei egin die alderdiei hondakinen kudeaketan adostasunak bilatzeko. Errazkinen aburuz, gaiari buruzko eztabaida gorabehera “gutxitan aipatzen da gai gehienetan bat gatozela”.

Adostasuna bilatzeko eremuak bi dira Errazkinen ustez: hondakinen bilketa, batetik, eta azpiegiturak, bestetik.

Lehenbizikoari dagokionez, diputatuak onartu du sentsibilitate diferenteak daudela, baina nabarmendu du denak ados daudela gehiago birziklatzeko premian.

Azpiegiturei buruz, Errazkinen esan du Gipuzkoa “errauskailuaren ondorengo eszenatokian” sartu dela. “Eztabaida erraustegiaren inguruan izan dugu azken urteetan, baina horrek hondakinak kudeatzeko gainerako azpiegiturei buruzko adostasuna ezkutatu du: alderdi politiko guztiek onartzen dute, adibidez, konpostatze plantak, tratamendu mekaniko-biologikorako plantak eta biometanizazio plantak behar ditugula Gipuzkoan”.

Horiek kontuan izanik, Aldundiak datozen hilabeteetan hondakinen kudeaketan adostasunak bilatuko dituela jakinarazi du. Gipuzkoako mankomunitate guztietako eta Batzar Nagusietako talde guztietako ordezkariekin elkartuko da Aldundia.