Hondakinen mahaiak porrot eginda, Bergarak Atez Atekoa ezarriko du

Atalak: Atez Atekoaren alde, Atez Atekoaren kontra, Udalak

Goienak zabaldu duenez (“Hondakinen Mahaiko negoziazioekin bukatzea erabaki du Bergarako Udal Gobernuak”, bideoz hornitua), joan den ekainean Bergarako udalak antolatutako Hondakinen mahaiak fruiturik eman ez duela eta, udal gobernuak erabaki du erakunde hori desegin eta hori abiarazterakoan herrian Atez Ateko sistema ezartzeko egiten ari ziren lanei berriro ekitea. Hedabideari udal gobernu taldeak jakinarazi dio:”Luzaro jardun dugu lanean, gaiaren inguruan benetako eztabaida sortu da eta alde guztiok gerturatze ahalegina egin dugu, baina ez dugu lortu bakoitzak ezartzen genituen baldintzak bilduko dituen sistemarik adostea. Saiatu garen arren, behin eta berriz iritsi gara puntu batera non ezinezkoa izan zaigun aurrera egitea”. Alkatetzatik eta Bergarako Zero Zaborretik Atez Atekoaren aurkakoei alternatiba berriak eskaini zaizkien arren une batean hurbilketa modu oro blokaturik geratu dela, alegia.

Bergarako alkatetzak baloratu du Debagoieneko mankomunitateari herriko erabakien atzerapenak oztopoak jartzen dizkiela ere, mankomunitateak gaikako sistema orokortua abiarazteko egin beharreko inbertsioak egiteko uzten ari zirelako.

Goienak albiste banatan, bideo eta guzti, bildu ditu mahaian parte hartu dutenen lehen erreakzioak, alde batetik Bergara Zero Zaborrena (“Hondakinen Mahaian ezin izan gara adostasunetara ailegatu, ez helburuetan ez jasotze sistemetan“) eta bestetik Bergara Garbiak, PSEk eta EAJk elkarrekin egin duten balorazioa (“Egundoko kolpea eman die Bilduk bergararrei atez atekoa inposatuz“). Diario Vascok ere bildu du erreakzio hau (“Bildu lanza un órdago a los bergareses al imponer el PaP“).

Datorren astetik aurrera Bergarako eta mankomunitateko teknikariak lanean hasiko dira abian jartzeko Atez Ateko bilketa, hemen ezaugarriok izango dituena: papera, ontzi arinak eta beira orain bezala jasoko dira kaleko edukiontzietan eta organikoa eta errefusa zintzilikarioetan.