Urri amaieran ‘Konpost Egunak’ jardunaldiak Hernanin eta Usurbilen

Atalak: Atez Atekoaren alde, Auto-konpostaketa, Auzolaneko konpostaketa, Prebentzioa

Gipuzkoa Zero Zabor, Hernanin Zero Zabor eta Usurbil Zero Zabor elkarteek urriko azken astebururako antolatu dituzte “Atez Atekotik Zero Zaborrerantz III Jardunaldiak”, aurtengoan gai monografiko bat lantzeko:

Konpost Egunak. Gipuzkoa Zero Zabor elkarteak bere blogean iragarri duenez “urte gutxitan herritar kontzientziadun minoritarioen jokabide militante izatetik kasik modako fenomeno bihurtu da konpost egitea Gipuzkoako eta Nafarroako herri askotan. Milaka familia ari dira bai norbere lur-muturrean edo bai udalak lagatako lurrean auzolanean beren hondakin organikoak konpost bihurtzen. Hiri hondakinen kudeaketan osagai funtsezkoa bihurtu da konpostatze autogestionatu hau”.

Konpostaren Egunak bi egunez burutuko dira:
–  Urriaren 24an, osteguna, Hernanin konpostaren inguruko mahai-ingurua.
–  Urriaren 27an, igandea, Usurbilen konpostaren erakusketa.