Tolosako udalak 22an aurkeztuko du bilketa sistemen konparaketa

Atalak: Atez atekoa, Bost edukiontzi txipdunak, Bost kontenedore, Lau kontenedore, Sistema mixtoa, Udalak

Tolosako alkate Ibai Iriartek iragarri du datorren asteartean, urriak 22, udalaren enkarguz Idema ingeniaritza enpresak hondakinen bilketa sistema ezberdinak alderatzeko prestatutako txostena aurkeztuko diela herritarrei. Tolosaldeko Atariak  “Hondakin bilketa sistemen alderaketa aurkezteko herri batzarra izango da asteartean” albistean aurreratu duenez, ikerlanak honako sistemok alderatu ditu: bosgarren kontenedore boluntarioa (Zarautz), nahitaezko bost edukiontzietan oinarritutako sistema (Zumaian onartu baina oraindik ezarri gabe dagoena), sistema mixtoa (Itsasondon erabili zutena herria Atez Ateko sistemara pasa baino lehen), bilketa sistema komunitarioa (Oviedo, Milan) eta atez ateko sistema (Tolosaldean dagoenekoz Alegia, Zizurkil, Amasa-Villabona, Irura eta Anoetan ezarrita dagoena, laster Ikaztegietan ezartzekoa). Txosten hau herritarrei aurkeztu eta udalean zehaztasunez eztabaidatu eta herrirako hautatu den formula erabaki ostean, Tolosak 2014an ezarriko omen du sistema berria.