Eskoriatzako datua: adi edukiontzi kolektiboetako organikoaren kalitateari

Atalak: Atez atekoa, Bost kontenedore, Udalak

[Pello Zubiria Kamino] Eskoriatzako udalak azaldu duenean hiru hilabeteko proba pilotuaren ostean zergatik erabaki duen herri osoan Atez Atekoa ezartzea, gutxiegi nabarmendu den datu hau aurkeztu du: edukiontzi kolektiboetan bildutako hondakin organikoak (5. edukiontzi marroi famatuan jasotakoak) ez du ematen gutxieneko kalitaterik. Ez behintzat Eskoriatzan.

Sistema bilketa ezberdinak eta hauen barruan herrika modalitate ezberdinak alderatzea moda bihurtuko den honetan, konparazioak ongi egiten ikasi beharko dugu, herritar guztiek eta kazetariok ere bai. Alderatu behar dira gaika jasotako hondakin atalen portzentaiak, batutako tona eta kiloak, baina baita ere jasotakoaren kalitatea. Kalitate hau, ingurumenarentzako dauzkan ondorioetatik harago, bada ekonomiaren aldetik ere gai inportantea: ez da berdin kostatzen oso garbia datorren organikoa konpost bihurtzeko tratamendua eta zikina datorrenarena. Honetan ere, kutsatzaileak pagatu behar du.

Guztia azaldu du Eskoriatzako alkateak -bideoan xehatzen ditu argudioak- Goienaren “Atez atekoa ezartzeko batzar informatiboak Eskoriatzan” albistean.