Sinadura bilketa Legazpin atzera borondatezko birziklatzea ezarri dadin

Atalak: Gizarte eragileak, Politikariak, Sistema mixtoa, Udalak

[Pello Zubiria Kamino] Legazpi Garbia plataformak antolatu eta PSE eta EAJ alderdiek sustaturik, gaurtik sinadura bilketan ariko dira Urola Garaiko herri hartan, udalak oraingo sistema berria utzi eta berriro errefusa kaleko edukiontzi handietan bildu dezan. Albistea Hitzak (“Edukiontzi sistemaren aldeko sinadura bilketa hasiko du plataformak“) eta Diario Vascok (“La plataforma realizará una recogida de firmas a favor del sistema de contenedores“) plazaratu dute.

Legazpin ezarritako sistema mistoan, hondakinak gaika sailkatzea derrigorrezkoa da, errefusa atez ate biltzen zaie herritarrei hauek zintzilikarioetan lagatzen dituzten kubo pertsonalizatuetatik, organikoa utzi dezakete aukeran (atez ate biltzeko zintzilikarioetan edo edukiontzi handian, baina batean edo bestean derrigor), eta gainerako atalak kaleko edukiontzietan biltzen dira. Sei hilabeteko probaren ondoren udalak orain ekin behar dio sistemaren balorazioari, dagozkion aldaketak sartzeko. Legazpi Garbia, PSE eta EAJk argudiatu dute errefusaren atez ateko bilketa askoz garestiagoa dela kaleko edukiontzietan egindakoa baino.

Sasietako lehendakari Azeari Andonegi, Enrike Enparantza teknikaria eta Iñaki Erauskin zerbitzuburua prentsaurrekoan azalpenak ematen. (Argazkia: Goierriko Hitza)

Aurreko asteetan Garbia plataformak eta bi alderdiek haizatu dituzte kaleko edukiontzi handietan bildutako organikoaren kopuruak. Baina datu hori bere testuingurutik atera dute, Sasietako arduradunek behin eta berriro azaldu dutenez. Legazpin bi aldagaietako bakoitza (posteetan atez ate, edukiontzi handietan) zenbat familiak hautatu duen, halako organiko kopurua biltzen du udalak, datuak ez dauka misteriorik. Baina datu on hori, hain zuzen, sistemaren derrigortasunak eta errefusa era kontrolatu eta pertsonalizatuan atez ate biltzeak esplikatzen du. Xehetasun bat gehitzeko, Sasieta bera eta udala ahalegintzen ari dira oraindik errefusarentzako ontzi grisa eskuratu duten familiek (Garbiaren plataformak horri ere boikot egiteko deia luzatua zuen) eskuratu dezaten.

Eztabaida bere testuinguru teknikotik aterata kaleko edukiontzi handien eskemara “atzera” (berriro, ostera) itzultzea proposatzen duena, ez du proposatzen Beasaingo sistemara itzultzea baizik. Sasietaren datuak esanguratsuak dira horretan. Begiratu aurtengo urtarrileko datuei. Legazpik errefusetan zabortegira bidali ditu 47,9 tona, biztanleko 5,49 kilo. Bost edukiontzi (txip eta guzti marroia, ordenantzetan birziklatzea derrigorrezkoa…) dauzkan Beasainek hilabete berean 227 tona bidali ditu errefusetan, biztanleko 16,47 kilo. Legazpiar baten kiloko, beasaindarraren 3 kilo. Konparaketa are argigarriagoa da auzoko herria den Zumarragarekiko: urtarrilean Zumarragako pertsona bakoitzak 18,30 kilo errefus sortu ditu, eta, aldiz, Legazpikoak 5,49 kilo. Legazpikok sistema da azkar aldatu beharrekoa ala Zumarragakoa?

Bataren eta bestearen arteko diferentzia ulertzeko ez dago misteriorik. Baldin eta osorik esplikatzen bada. Lehenak, birziklatzea betebehar deklaraturik eta hondakinak pertsonalizaturik (autoa pertsonalizatzen duen bezala matrikulak eta etxebizitza helbide zehatzak), hondakinen kudeaketa hobetu eta justiziazko bilakatzeko bidea irekitzen du. Bigarrenak, birziklatzea borondatezko deklaratuz kutsatzeko eskubidea aldarrikatzen du, ondo egiten duten herritarrak mesprezatu eta oker egiten tematzen direnak saritzen; hortik ez dago kudeaketa hobetzerik.

[2014-03-06, eguneraketa] Gaiaz albiste gehiago:
“Plataforma y oposición abren la recogida de firmas a favor del sistema de contenedores” (Diario Vasco)
“PSE-EE #Legazpi apoya campaña recogida d firmas organizada por Plataforma para implantar Contenedor Gris y contra PaP” (Twitter)
“El PSE-EE de Legazpi ha registrado una propuesta de recobida de residuos basada en contenedores con chip” (Socialistas Guipuzcoanos)
“”