Bergarako otsaileko emaitzak: %81 gaika, errefusa lehengoaren %15,4

Atalak: Atez atekoa, Udalak

[Pello Zubiria Kamino] Bergarako herriak hilabete eta erdi egin duenean hondakinen bilketa sistema berrian, Atez Atekoan, udalak egoeraren laburpena eskaini du prentsa oharrean. Zer dioen? Bergaran sistema aldatzearen inguruan sortutako zalaparta jarraitu duen edonorentzako, lehenbiziko emaitzak eskaini ditu udalak: otsailean gaikako bilketan hasi eta hilabetera %81era iritsi direla Bergaran eta hondakinen atal problematikoena den errefusa izugarri gutxitu dutela, 2013ko otsailean bergararrek sortu zituzten 296,5 tona errefusen aldean aurtengoan 45,9 tona, iaz bildutakoaren %15,4.

Ohar berean udalak abisua eman die oraindik zabor zorroak lurrean -zintzilikatzeko gako pertsonalizatuetan ipintzeko ordez- uzten dituztenei, ohartaraziz aurrerantzean ez dituela lurrean lagatako zaborrok jasoko eta horretan harrapatzen dituen herritarrei txostena ireki eta jarraipen pertsonalizatua egingo zaiela.

Udalaren prentsa oharrak titulu hau darama bere webgunean ikus daitekeenez (ostiralean, 14, arratsaldeko 15:09etan sareratua): “Otsailean hondakinen %81etik gora jaso da gaika bereizita Bergaran” euskaraz eta gaztelaniaz “En febrero se ha recogido más del %81 de los residuos separados por fracciones“. Hedabideek honela egin diote oihartzun albisteari:

– Goiena “Bergarako Udalak positibotzat jo du gaikako hondakin bilketak egindako ibilbidea”
– Diario Vasco “Anuncian que no se recogerán las bolsas de basura del suelo desde esta semana“.
– Gipuzkoa Zero Zabor “Bergarako mistoaren emaitzak: Otsailean hondakinen %81etik gora jaso da gaika bereizita Bergaran”