Azkoitian Legazpi eta Ormaiztegiko sistema jarriko dute udan

Atalak: Sailkatugabeak

[Pello Zubiria Kamino] Urola Erdiko mankomunitatearen kide den Azkoitiak (11.492 biztanle) udan ezarriko du hondakinak batzeko sistema berria, hala erabaki du gehiengoz Hondakinen Mahaiak, EH Bildu, Azkoitia Bai eta Zero Zaborren aldeko botoekin eta PSE-EE eta EAJren kontrakoekin. Albistea eman dute Hitzak (“Hondakinak biltzeko sistema mistoa jarriko dute Azkoitian, udarako“), Noticias de Gipuzkoak (“Azkoitia implantará “en verano” el sistema mixto de recogida“) eta Diario Vascok (“Bildu y Azkoitia Bai implantarán un sistema mixto de recogida de basura“). Horien kroniketatik dakigunez, Azkoitian ezarriko dena izango da jadanik Ataunen daukatena eta laster Ormaiztegin edukiko dutena; Legazpin daukatenaren oso antzekoa ere bada, alde batera uzten badugu Legazpin organikoa Atez Ate biltzen zaiela hala nahi duten familiei.

Sistema mistoa bezala Atez Ateko mistoa ere izendatu daitekeenak frakzio bakarra biltzen du Atez Ate, errefusa, edukiontzi txiki pertsonalizatuetan. Gainerako atalak kalean lagatako kontainer handietan biltzen dituzte, organikoa txip elektronikoz kontrolatutako batean. Azkoitian ez da libre izango zaborrak nahasirik jaurtitzea, horientzako gaur dauden kontainer berde handiak desagertu eginen dira kaleetatik. Azkoitiko sistema berria abiatutakoan, eta Legazpin bezala gaikako bilketan %70a gainditzen baldin badu, Gipuzkoan denetara 168.645 herritar biziko dira Zero Zabor estrategian aurreratutako udaletan, gipuzkoarren %23,7.