Zer darama barruan zabor nahasiendako edukiontzi berdeak?

Atalak: Bost kontenedore, Ekitaldia, Udalak

[Pello Zubiria Kamino] “Betiko” kontainerra da arazoa, “berdea”, hondakinen kudeaketaz zerbait galdetu duen edonork ikasi duenez. Zalapartak aipatzen ditu “bostgarren edukiontzia”, “kuboa”, “zintzilikarioa”, “txipa” eta gaineratikoak, baina herritar arduragabeak zabor guztiak nahasian libreki bota ditzakeen kutxa handi berde hori kalean edonoren eskueran egotea da gaika gehiago biltzeko eta birziklatzeko arazo nagusia. Berrikitan Zumaian eta Donostian erakutsi dute berriro.

Zumaian udaleko eta mankomunitateko agintariek ipini dituzte denen bistan horietako bi kontainerrek erraietan daramatzatenak. Hitzak titulatu du “Bi errefuxa edukiontzi aztertu dituzte gaur goizean Zumaian” eta Noticias de Gipuzkoak “Zumaia analiza dos contenedores donde el 64,82% se podría reciclar“. Titulu honek berak dioenez, Zumaiko edukiontziok daramaten 100 kilo zabor nahasitatik %65 probestu zitekeen ongi bereizi balitz.

Bigarren erakustaldia Donostiako Hondakinen Bilguneko militanteek burutu dute Amaran. “Hondakinen Bilguneak edukiontzi berdera edozer botatzen dela erakutsi du Amaran”” kronikan bildu du albistea Hitzak. Gipuzkoa Zero Zabor elkarteak bere blogean bildu ditu Bilguneak aurkituen xehetasunak “5. edukiontzi ez hain inteligentea” sarreran. Antza denez, birziklatzea borondatezkoa den Amarako kontainer berde betikoek  barruan daramaten zaborraren %90 da ondo sailkatuz gero probetxugarria.

Hondakinen Bilgunekoek deklaratu dute: “Hamar egun dira Donostiako Udalak edukiontzi marroi berriak ezarri dituela Amaran. Hainbat bizilagunek urteak daramatzazue organikoa birziklatzen, beste batzuek izena eman eta txartelarekin lehen esperientziak bizi berri dituzue.  Eta gainontzekoak? Zein asmo duzue? Orain arte bezala dena batera eta nahastuta zaborretara botatzea? Eta udalak esku hartuko du? Birziklatzen ez duen hiritarrekin zer geratuko da?”