San Markoko herrien 2013ko emaitzak: pertsonako 80 kilo errefus versus 245

Atalak: Mankomunitateak

[Pello Zubiria Kamino] San Marko mankomunitateak Interneten ipini ditu hondakinen bilketan mankomunitateak bere osoan eta herriek banaka 2013an lortutako emaitzak. Aurretik, martxoaren 13an, datuak osotasunean eskaintzeko ordez horien gainean egindako irakurketa xelebrea eskainia zuen bere lehendakari Denis Itxasok; irakurleak ondo egingo du Mankomunitatearen webgunean “Hiri hondakinen gaikako bilketan San Markok % 36a gainditu du” albistea irakurrita, ondoren erkatzeko orain plazaratutako datuekin. Eta zer diote San Markoko 2013ko datuek?

– Hasteko, hondakinen kontabilitatean parte hartzaile guztiek ados jarri beharra daukate, batik bat gaikako bilketan lortzen diren portzentajeetan ados jartzeko. Kontraesanak (edo informazioak argiago eman beharrak) denetan ari direlako gertatzen. Zehazki Atez Atekoan ari diren herrietan, udalek eta San Markok ematen dituzten portzentajeak ez datoz beti bat. Aldi berean, San Markok (aurretik Sasietak egin duen bezala) herri guztien emaitzak irizpide berarekin neurtzeak batzuen eta besteen arteko ezberdintasunak ondo nabarmentzea baimentzen du.
– Osorik hartuta, 312.176 biztanle dauzkan mankomunitateak 119.000 tona bildu du, horietatik %36 gaika bereizita. Errefusetan 76.000 tona, urteko eta biztanleko 245 kilo errefus.
– gaikako bilketa orokortu eta derrigorrezkorik gabeko herrietan birziklatze tasa %40aren azpitik dabil eta errefus kopurua biztanleko 200 kilotik gora: Donostia, gaika %30, biztanleko 292 kilo errefus; Errenteria, gaika %31, biztanleko 230 kilo errefus; Lasarte-Oria, gaika %35, biztanleko 221 kilo errefus. Borondatezko sisteman ari diren herrietan emaitzarik onenen emailea Urnieta da: gaika %44 biltzen du, eta biztanleko 208 kilo errefus.
– Atez Atekoan 2013an hasi diren herrietan kontabilitatea egiterakoan kontutan eduki behar da zein hilabetetan hasi ziren eta Pasaiaren kasuan herriaren auzo bakar batean hasi zela iaz. Horrela: Pasaiak urteko bataz bestekoa gaika %35 eman du eta biztanleko 242 kilo errefus (abenduan gaika %42ra igota zegoen); Lezok 2013 osoan gaika %61 (abenduan %85) eta biztanleko 102 kilo errefus; Astigarragak 2013an gaika %62 (abenduan %79) eta biztanleko 122 kilo errefus.
– Atez Atekoan lehendik ari ziren herrietan: Oiartzunek gaika %76 eta biztanleko 78 kilo errefus; Usurbilek gaika %78 eta biztanleko 79 kilo errefus; Hernanik gaika %76 eta biztanleko 60 kilo errefus.

Hondakinen kudeaketa burutsu baten helburua denez azken errefus nahasi eta birziklagaitza ahalik eta gehien murriztea, nabarmena da bilketa sistema ezberdinen emaitzen arteko aldea. Zabor nahasiarendako kontainer handia (praktikan kutsatzeko eskubidea bermatzen duena) libre dagoen herrietan biztanle bakoitzak 200 kilo errefus baino gehiago botatzen du harrika. Aldiz, Atez Atekoan ari direnetan (kontainer oro-jalea kendurik) errefus kopurua 80 kiloren azpitik dabil.