Gipuzkoak aurten iaz baino %11 errefus gutxiago sortzen du

Atalak: Aldundiak, Errefusa

Zabortegira bidalitako zabor tonak urtarril, otsail, martxo eta apirilean (Irudia: Gipuzkoako Foru Aldundia)

[Pello Zubiria Kamino] Urtetik urtera, 2007tik hasita, zabor nahasi edo errefus gutxiago sortzen ari da Gipuzkoa eta zehazki 2014ko lehen lau hilabeteetan iazko denboraldi berarekin alderatuz kopuru hori %11 gutxitu da; datu horrek erakusten du PIGRUG plan orokorrean aurreikusita zegoen errauskailua tamaina handiegiz zegoela dimentsionatuta. Horra Iñaki Errazkin Gipuzkoako Ingurumen diputatuak prentsaren aurrean azaldu duenaren mamia. “Nork heldu nahi dio, datu hauekin, Zubietako erraustegi proiektuari?” galdetu die publikoan errauskailua eraikitzean tematzen diren PSE, PP eta EAJko politikariei, hau gehituz: “260.000 tonarako erraustegia zen, eta aurtengo aurreikuspena zabortegietara 170.000 tona bidaltzea da. Hau da: 90.000 tona hondakin ekarri beharko genituzke kanpotik, edo bestela, tarifa izugarri garestitu.”

2007an 276.038 lurperatu zituenetik Gipuzkoak, urtez urte apaldu da zabor nahasi kopurua. 2012an zabortegietara eramandako 209.261 tonak 2013an  190.383ra murriztu ziren. Baina are jaitsiera handiagoa ikusi da 2014ko lehen lau hilabeteok iazkoekin alderatuz: iaz 64.761 tona zabor bildu ziren lekuan orain 57.556 bildu dira. Errazkinen esanetan,  aurreikus daiteke 170.000tan geratuko direla. Kopuru horretarako dauka, hain juxtu, dimentsionatuta Zubietan tratamendu mekanikoa eta biologikoa egingo dien planta berria GHK kontzortzioak. 2016an gaikako bilketa lurralde osoan %60ra iristen bada -eta azken hilabeteotako joerak hori posible dela erakusten du- urte hartan 132.000 tona errefus tratatu beharko dira Zubietan, denetara 40.000 azken errefus inerte emango dutenak.

Errazkinen aurkezpenak eman duenaren xehetasunak Diputazioak berak “Gipuzkoak % 11 murriztu ditu zabortegira bidalitako hondakinak aurtengo lehen lau hilabeteetan“albistean eskaintzen ditu. Laburpen grafikoa, berriz, PDF formatuan “Errefusaren bilakaera, 2014 urtarrila-apirila” dokumentuan. Horietan begiratzen ahal du zahaztapenak nahi dituenak, esateko eskualdeen artekoak: txapelduna den  Sasietak %35,2 murriztu du bere errefusa, herena baino gehiago, eta, aldiz, azken-putz dabilen Urola-Kostak lehengo berean jarraitu du.

Gainerako hedabideek honela bildu dute albistea:
Naiz “Gipuzkoak %11n murriztu du zabortegira bidaltzen diren hondakinen kopurua”
Goiena “Debagoienak %27,2 hondakin gutxiago bidali du zabortegira urteko lehen lauhilekoan, Aldundiaren arabera”
“Tolosaldeak 1.358 tona hondakin gutxiago bidali ditu zabortegira” (Tolosaldeko Ataria)
Diario Vasco “Errazkin señala que se ha reducido un 11% los residuos que se envían a vertederos”
Noticias de Gipuzkoa “Gipuzkoa envía a los vertederos un 11,13% menos de residuos en el primer cuatrimestre“, “Bildu insiste en que la planta de zubieta se abrirá en 2015“