GHKri 67,8 milioi euroko galera eragitea leporatu dio Ormazabali EHBilduk

Atalak: Batzar Nagusiak

[Pello Zubiria Kamino] Otsailean ekin zion bideari Gipuzkoako Batzar Nagusietan GHKren finantziazioa ikerteko batzordeak, garaian plazaratu genuenez: “Haserre artean hasi da Gipuzkoako Batzar Nagusietan errauskailuaren ikerketa batzordea“. GHKk Zubietako errauste plantaren asmoa betikoz gelditzea erabaki eta hura eraikitzen ari ziren enpresekin kalte-ordainak adosturik, EAJ, PSE eta PPk sortu zuten.

Aurreko astean deklaratu baldin bazuen GHKren gaurko lehendakari Ainhoa Intxaurrandietak (ikusi “2011 baino lehen GHKn bazekiten errauskailua handiegia izango zela“), joan den ostiralean GHKren aurreko bilehendakarik egin zuten, Luis Mari Oiarbidek eta Karlos Ormazabalek, gehi Ana Ereñok, hau ere GHKko buruzagitzakoa izana. Ormazabalek (EAJ) esan zuena Noticias de Gipuzkoak bildu du ondoen: “Ormazabal duda de que las previsiones forales sobre residuos se cumplan” eta “Residuos sin tiempo ni dinero“. Oiarbideren (Hamaikabat) iritziak (“Japón es el país con más incineradoras y también con mayor esperanza de vida“) Diario Vascok. Egunean bertan Berriako Mikel P. Ansak Twitterrez egin zuen bilkuraren jarraipena.

EHBilduk bileran GHKren aurreko buruzagiei, zehazki Ormazabali, aurpegiratutakoa beren blogean plazaratu dute: “67,8 milioi euroko galera leporatu dio EH Bilduk Karlos Ormazabal aurreko legealdiko ingurumen diputatuari“. Inko Iriarte batzarkideak zehaztu zituen kopuruok: 8 milioi euro errauste planta gelditzeagatiko kalte ordainetan; banketxeekin adostutako finantzaketa arriskutsuaren ondorioz, sinaduraren unean 5,6 milioi gehiago; eta horiei  swapen ondorioz Gipuzkoak ordainduko dituen 54 milioi gehituta, EHBilduren aburuz Karlos Ormazabalen kudeaketak gipuzkoarrei guztira 67,8 milioi inguruko galera eragin die.