Bilboko hondakinak ere Zabalgarbin erretzea erabaki du udal batzarrak

Atalak: Bizkaia, Udalak, Zabalgarbi

Atzo, ekainak 26, Bilboko udal batzarrak osoko bilkuran erabaki zuen Bizkaiko hondakinen kudeaketa sarean sartzea. Horrek esan nahi du, berrikitan inauguratu zen Tratamendu Mekaniko Biologikotik pasa ondoren Zabalgarbiko errauste plantan kiskaliko dituztela. Berria egunkariak zabaldu du albistea: “Zaborra Zabalgarbira eramatea onartu du Bilboko udalak“. Maite Asensiok idatzitako kronikaren arabera, EAJk eta PPk bozkatu dute proposamenaren alde, EH Bilduk aurka, eta PSE-EE abstenitu egin da. Bilduko zinegotzien jarrera EHBilduk ezagutarazi du bere webgunean: “PNV y PP dejan a un lado el reciclaje y se lanzan de lleno a la incineración de residuos“. Aurreko legealdian Iñaki Azkunak EAJren izenean Ezker Batuarekin zeukan adostasunari esker Bilboko zaramak errauste eskematik aparte geratzen ziren eta Artigaseko zabortegira zihoazen. EHBilduk joan den azaroan salatua zuen ordurako hartuta zegoela erabakia Zabalgarbira eramaten hasteko: “Bilboko hondakinak erraustea erabaki du udal gobernuak, EHBilduk dioenez“. Eztabaidan Jose Luis Sabas Obra eta Zerbitzuetako zinegotziak erantzun zion Atez Atekoa defenditu zuen Aitziber Ibaibarriaga (Bildu) zinegotziari: “Bilbon atez atekoa abiatuko bagenu, herritarrek itsasadarrera botako gintuzkete”.