Azkoitia Baiko zinegotziek berretsi dute sistema mistoaren aldeko apustua

Atalak: Politikariak, Sistema mixtoa, Udalak

[Pello Zubiria Kamino] Hondakinen inguruko eztabaidan hartutako erabakiak esplikatu eta defenditzera azaldu dira berriro jende aurrera Azkotia Bai zerrendako zinegotziak. Gauzak asko gaiztotu dira Azkotian azken asteetan eta  derrigorrezko birziklatzearen kontrako taldeek gogortasun bereziz erasotu dituztela (ikusi Atez Atekoaren kontrako Plataformako Cruz Alberdik plazaratutakoak) sentitu dute Azkoitia Baiko hautetsiek. Azkoitian Bilduk agintzen du 8 zinegotzirekin, oposizioan dago betidanik alkatetza edukia zuen EAJ 6 zinegotzirekin eta Azkoitia Bai taldeak bi zinegotzi dauzka. Azken hauteskundeetan izen horrekin aurkeztu ziren ordura arte Batera deitutako herri plataforma Aralar, Ezker Batua eta Berdeekin elkartuta.

Diario Vascorako Joaquin Sudupek egin “Azkoitia Baik hondakin bilketa aldaketaren zergatiak azaldu zituen” kronikan kontatzen denez, Azkoitia Baiko zinegotziek kontatu zuten herrian jarriko den sistemaren historia. Bilduk hasieran Atez Atekoa jartzea proposatuta, taldeak ezezkoa eman zion; aldiz, ondoren talde guztien artean osatutako Hondakinen Mahaian parte hartu zuen eta orain jarriko den sistema mistoa mahai horretan alderdi guztiek onartutako irizpideak biltzen dituena da. Are gehiago, Azkoitia Baik berretsi du herrian sistema hau ezartzeko lehen proposamena EAJko kideek egin zutela, nahiz eta gero atzera egin duten, eta geroztik Ormaiztegin [udaleko alderdi guztien oniritziarekin ] ezarritako sistema misto bera dela.

Gai hau jorratzeko Azkoitian egin den bidea oso ontzat eman zuten taldeko kideek: “Prozesu interesgarri eta mamitsua, adituen hitzaldiekin eta herritar guztiei irekia. Gur ustez Azkoitian inoiz egin den parte hartze prozesu serio eta interesgarriena”.

Azkoitia Baiko zinegotziek albiste bat aurreratu zuten jendaurreko agerraldian: uztailaren 22an hasiko dela lehenbiziko aldiz errefusa zintzilikarioetatik biltzen.

[P.S.] Urola-Kostako Hitzak ere bildu du albistea: “Azkoitia Baik jakinarazi du hilaren 22an hasiko direla errefusa atez ate jasotzen“