Europak zigortu omen duen Legazpiko zabortegiaren misterioa

Atalak: Europa, Zabortegia

[Pello Zubiria Kamino] Joan den ostiralean, uztailak 11, honako titulua eskaini zuen Noticias de Gipuzkoa egunkariak: “Bruselas denuncia a España ante el Tribunal de la UE por el vertedero de Legazpi“. Aurretik zeraman “Años de ultimátums e incumplimientos” eta ondoren “Es uno de los 28 que tendrían que haber sido clausurados hace cinco años“. Albisteak zioenez, Legazpiko zabortegiak 2009an itxita behar zuen eta hala ez dagoenez, eta hori bezala beste 27 gehiago Espainiako Estatuan daudenak noiz itxiko zain itxaroteaz asperturik, Europar Batasunak auzitara eramatea erabaki omen du.

Hondakinen inguruko aktualitateari jarraipena egiten dion askori deigarri egingo zitzaion Noticiasen albistea. Hasteko, berria ilustratzen zuen argazkia zegokiolako beste zabortegi bati, San Markokoari hain zuzen, hau lege guztiak betez ixteko bidean dagoenean. Bigarrenik, albisteak aipatzen zuelako EAEko bigarren zabortegi ustez ilegala, Ortuellakoa, eta hori ez dute eraman titularrera ez ulertzekoa denez Gipuzkoan saltzen den Noticiasek baina ezta Bizkaian saltzen den talde bereko Deiak ere, zeinak albistea berdin berdin eman baitu (“Bruselas denuncia a España ante el Tribunal de la UE por el vertedero de Legazpi“), baina kasu honetan kazetariaren sinadura eta guzti: Silvia Martinez Bruselatik.

Kontua da… Legazpin ez dagoela zabortegirik. Ez guk dakigula, bederen. Legazpiko zaborrak (eta sistema mistoa ezarri dutenetik, azken errefusa) Sasietakora eramaten dituzte. Legazpin badago ontzi arinak tratatzen dituen biltegi bat, baina guztiz dago legearen barruan. Egunak pasatu dira eta inon inork ez du Legazpiko balizko zabortegi misteriotsuaren pistarik azaldu. Are bitxiagoa dena, gaiari Madrilgo El Paisek eman dion albistean (“Bruselas denuncia a España por tener abiertos 31 vertederos ilegales“) ez da Legazpikorik aipatzen; bai ordea Ortuellakoa.

Norbaitek lagunduko ote digu argitzen Legazpiko zabortegiaren misterioa?