Donostiak alde zaharreko ostatuei organikoa atez ate bilduko die egunero

Atalak: Atez atekoa, Bost kontenedore, Udalak

Azaroan Donostiako udalak hondakin bilketa berria ezarriko du Alde Zaharrean. Orain arte eta urte luzez bertan “atez ateko basatia” egiten dute, familiek hondakinak atarietan utzirik. Azarotik aurrera bi modu ezberdinetan kudeatuko dira familien eta komertzioen hondakinak. Familiei edukiontziak ezarriko zaizkie zenbait gunetan eta organikoa txip bidez kontrolatutako kontainer marroietan lagatzeko aukera eskainiko. Merkatariei, berriz, gaika sailkatutako hondakin guztiak atez ate bilduko zaizkie; organikoaren kasuan, bilketa egunero egingo zaie.

Donostiako Parte Zaharrak 110.000 metro karratu ditu, 4.270 biztanle, 179 ostalaritza leku eta 269 denda. Zonalde honetako ostatu guztien organikoa batzea nabaritu beharko luke Donostiak ematen dituen birziklatze tasetan. Ikusiko da hor bizi diren 1.700 inguru familiatatik zenbat hasiko diren organikoa bereizten. Donostiako udalaren helburua da hiriko 30.000 familiak bereiztea organikoa borondatez eta oraingoz 16.500 ari dira. 2013an Donostiak pertsonako 292 kilo errefus sortu zuen, San Marko mankomunitatearen zifretan, mankomunitatearen bataz bestekoa den 245 kiloen oso gainetik; Atez Atekoan ari diren herriak, aldiz, 60 kilo inguruan ari dira sortzen.

Albistea hedabideetan:
“Hondakin bilketa sistema berria, Parte Zaharrean” (Donostiako Udala)
“Parte Zaharreko hondakinak biltzeko sistema berri bat ezarriko dute azaroan” (Hitza)
“Hondakinak biltzeko sistema berria jarriko dute Donostiako Parte Zaharrean” (Gara)
“La Parte Vieja estrenará sistema de recogida de basuras en noviembre” (Diario Vasco)
“La recogida orgánica llega a la parte vieja” (Noticias de Gipuzkoa)