AEBetako Seattle hiriak isuna jarriko dio zaborretan organikoa nahasten duenari

Atalak: Amerika, Udalak

Gaikako hondakin bilketa Seattlen. (Argazkia: Komonews)

[Pello Zubiria Kamino] Associated Press agentziak zabaldu duenez, AEBetan Seattle hiriak (635.000 biztanle) legez debekatu du zaborretan organikoa nahasirik botatzea eta urte berriarekin hasiko da isunak ezartzen debekua betetzen ez dutenei. Oregon Live egunkari elektronikoan irakur daitezke xehetasunak:”Seattle to fine residents who don’t compost food waste“.

Seattleko udalean hondakinez okupatzen diren zerbitzuek kalkulatu dute herritarrek lagatzen dituzten hondakinetan heren bat eta erdia arteko kopurua organikoz osatuta dagoela. 2015rako %60ko birziklatze tasara iristea dauka helburu Seattlek eta organikoa onduta 38.000 tona konpost eskuratzea. Horretara iristeko, urtarriletik aurrera udal zerbitzuek kontrolatuko dituzte hondakinen edukiontziak eta horietan zabor nahasien artean %10 baino gehiago organiko aurkitzen baldin badute automatikoki isuna ezarriko da.

Seattle ez da horrelako neurriak hartu dituen lehen hiria Estatu Batuetan. San Franciscok aspalditik dauka organikoa zaborrekin nahastea debekatuta. Berrikitan Euskal Herrian ibili da San Franciscoko udalean Zero Zabor estrategia koordinatzen duen Jack Macy San Frantziskoko Zero Zabor arduraduna, (ikusi lotura erabiliz Berriak egindako elkarrizketa). Seattleren kasuan, Associated Press agentziak azaldu duenez,  “Hondakinen Zerbitzuak udalari eskatu dio aztertzeko isunak jartzea, erakundea ez delako iristen ari birziklatzeko eta konpostatzeko helburuetara. Udalbatzak 9 baiezkoz eta kontrako boto bakar bat gabe onartu du erabakia. Aldaketak ez zuen eskatzen eztabaida publikorik.”