San Marko: zer dago Itxasok falta omen dituen 262.000 euroen atzean?

Atalak: Ekonomia, Mankomunitateak, Udalak

[Pello Zubiria Kamino] Gaur Diario Vascok plazaratu du: “Itxaso denuncia que seis ayuntamientos de Bildu adeudan 262.000 euros a San Markos“. San Marko mankomunitateko lehendakari Denis Itxasok egunkari horri esan dionez, Astigarraga, Hernani, Lezo, Oiartzun, Pasaia eta Usurbilek erakunde harekiko omen daukan zorrak «arrisku larrian jartzen ditu Donostialdean gaikako bilketa eta birziklatzea bermatzen duten zerbitzuak». DVren kronika Estokolmotik leitzen duenak ondorioztatuko du Donostialdean gaikako bilketa bat egiten dela eta herri horiek arriskuak jartzen dutela, ziurrenik birziklatzen txarrenak direlako. Baina nola ote da posible birziklatzen txapeldun direnek ez pagatzea beren gastuak?

Irakurlea ez gehiago nekatzeko, esan dezagun joan den maiatz hondarrean zabaldutako albiste baten errepikapena dela. Orduan ere Denis Itxasok egunkari beraren bitartez salatu zuen kontu bera, alegia herriok ez zituztela mankomunitatearen gastuak pagatu nahi, denen zerbitzuak arriskuan jarriz. Orduan, gainera, Diario Vascok titular gezurti eta manipulatzaile honen oparia egin zion Itxasori: “Los municipios del puerta a puerta no quieren seguir pagando la recogida selectiva“.

Beraz, San Markoren eta aipatu herri horien artean dagoen eztabaidaren mamia zertan datzan jakin nahi duen irakurleak, ekainaren 2an blog honek publikatu genuen kronikatxoan aurkituko du azalpena: “San Marko versus Atez Ateko herriak: justiziari buruzkoa da eztabaida“. Hortik aurrerakoa, Itxasoren komunikazio kabinetearen operazioa.